Maqtaral aýdanynda "Órleý" jobasynyń arqasynda kásibin ashyp, áleýmettik jaǵdaiyn túzep jatqan otbasylar kóp. Biyldyń ózinde 3046 otbasyndaǵy 18909 adam dál osy jobanyń jemisin kórip otyr.
"Órleý" jobasynyń arqasynda qarjy alyp, saýda dúkenin ashqan Gúlizar Menglisqyzy búginde otbasyn asyrap, bala-shaǵasyn baǵyp otyr. Jobanyń arqasynda 564 000 teńge alǵan ol Elbasymyzdyń saiasatyna dán riza. Sol siiaqty Qorǵanbai Ýbaidýllauly 391000 teńge qarjylai kómekti maqsatty túrde jumsaǵannyń arqasynda 3 iri qara mal alyp, sharýashylyǵyn damytqan.
Ońtústik Qazaqstan oblysy boiynsha "Órleý" jobasyna qatysqandardyń 14,9%-y, qarjylai kómek alǵandardyń 27,4%-y maqtaraldyqtar eken. Aýdan boiynsha jobadan qarjylai kómek alǵandardyń 79,6%-y mal sharýashylyǵymen ainalysýda, sondai-aq qus sharýashylyǵy, saýda-sattyq, óndiris t.b. kásippen ainalysyp jatqandar da bar. Sonyń arqasynda jobaǵa qatysýshylardyń tabysy 4,3 ese ósken.
Aita keteiik, 2017 jyly "Órleý" jobasy arqyly maqtaraldyqtar jalpy somasy 1,6 milliard teńge qarjylai kómek alǵan.
«Órleý» jobasy Elbasynyń «100 naqty qadam» jospary negizinde jasalǵan. Jospardyń 84-shi qadamynda bylai delingen: «Áleýmettik kómekti onyń ataýly sipatyn kúsheite otyryp, ońtailandyrý. Áleýmettik kómekti tek oǵan shynymen zárý azamattar ǵana alady. Kirisi tómen eńbekke qabiletti azamattarǵa memlekettik ataýly áleýmettik kómek tek olardyń eńbekke yqpal etý jáne áleýmettik beiimdeý baǵdarlamalaryna belsendi qatysýy jaǵdaiynda ǵana beriletin bolady». Qazirgidei daǵdarys jaiynda jumyssyzdyq pen kedeiliktiń sheginen shyǵýdyń joldaryn memleket te barynsha usynyp jatyr. Sonyń biri - «Jumyspen qamtý - 2020 jol kartasy» baǵdarlamasy. Jasyratyny joq, qoǵamda áieli men bala-shaǵasynyń nápaqasyna jarmasyp, jumys istemei júre beretin er azamattar kóbeiip ketken. Olarǵa ataýly áleýmettik kómek berý arqyly kedeilikten aryltýdyń múmkin emestigi kún saiyn ańǵarylyp keledi. Sondyqtan, memleket halyqtyń qolyna qarmaq berý úshin «Órleý» sekildi jobalardy qolǵa alýda.
