Ordabasy aýdanynda qoishy ózine senip tapsyrylǵan maldy 16 mln teńgege satyp jibergen. Bul týraly Túrkistan oblysy Politsiia departamentinen málim etti, dep habarlaidy QazAqparat.
Departament taratqan málimetterge qaraǵanda, Ordabasy aýdandyq politsiia bólimine jergilikti turǵyn aryzdanǵan. Er adamnyń aitýynsha, ol ózi basqaryp otyrǵan jaiylymdyq jerdegi qoishyǵa asyl tuqymdy maldaryn senip tapsyrǵan.
Alaida, mal basyn túgendeýge barǵanda, olardyń tolyq emes ekendigin baiqaǵan. Osylaisha jábirlenýshige kelgen shyǵyn kólemi - 16 380 000 teńge.
Atalǵan jaitty politsiia qyzmetkerleri QR QK-niń 189-baby «Senip tapsyrylǵan bóten múlikti iemdenip alý nemese talan-tarajǵa salý» boiynsha tirkeýge aldy.
Habar kelip túsken boida tártip saqshylary oqiǵa ornyna shuǵyl shyqty. Politsiia atalmysh qylmysqa kúdikti retinde jábirlenýshiniń qoi baǵyp júrgen jumysshysyn ustady. Ol Arys aýdanynyń turǵyny bolyp shyqty.
Anyqtalǵandai, sezikti er adam 2021 jyldan beri 230-dan astam usaq maldy 4-5-eýden satyp otyrǵan, aqshasyn jaratyp jibergen. Qazirgi tańda kúdikti qamaýǵa alynyp, oǵan qatysty sotqa deiingi tergeý amaldary júrgizilýde.
Politsiia qyzmetkerleri oqiǵanyń tolyq mán-jaiyn anyqtaýǵa kiristi.
«Túrkistan oblysynyń politseileri turǵyndarǵa maldaryn beitanys adamdarǵa baqtyrmaýǵa keńes beredi. Sondai-aq, múmkindiginshe maldy tańbalap, syrǵalap, en saldyrý kerek», - delingen habarlamada.
