Memleket jáne qoǵam qairatkeri Orazkúl Asanǵazy ulttyq tárbie berý men otbasy qundylyqtaryn damytý máselelerine qatysty pikir bildirdi, dep habarlaidy QazAqparat .
«Elbasy Nursultan Nazarbaev Qazaqstan halqy Assambleiasynyń otyrysynda «2020 jyly mektep oqýshylary 100 paiyz qazaq tilin meńgeredi» degen edi. Eshkimdi synaýdan aýlaqpyn. Alaida, osy «dóńgelek ústelge» Bilim jáne ǵylym ministrliginen kelip otyrǵan ókilge ótinish: aldaǵy oqý jylyn jańasha bastasańyzdar. Aralas mektepterdi qazaq mektepterine ainaldyrý úshin ne istedińizder? Qoǵamdaǵy «qazaq mektebindegi balalardyń bilimi tómen» degen túsiniktiń jalǵan ekenin anyq bilemin. Mysaly elordadaǵy «Daryn» mektebin bitirgen 45 balanyń 43-i grantqa tústi. Nege biz osyny aitpaimyz?», - dep saýal tastady Orazkúl Asanǵazy «Otbasy kúni» aiasynda ulttyq tárbie berý men otbasy qundylyqtaryn damytý máseleleri talqylanǵan dóńgelek ústel otyrysynda.
Onyń aitýynsha, elordada osydan birneshe jyl buryn 14 kórsetkish boiynsha astanadaǵy úzdik 10 mektep anyqtalǵan. Sol bilim ordalarynyń toǵyzy – qazaq mektepteri bolyp shyqty.
«Nege bilim basqarmalary osy kórsetkishterdi gazetterge jazbaidy, nasihattamaidy? Qazaq tilin nasihattaý baǵytynda da qazaq gazetteri ondaǵan material jariialasa, orys tilindegi basylymdar bir-ekeýden aspaidy. Sovet ókimeti aqymaq bolǵan joq. Almatyda, Shymkentte jáne Tselinogradta bir ǵana qazaq mektepten bolǵan. Maqul, qalanyń tórt buryshyna tórt orys mektebin qaldyraiyq ta, qalǵanynyń bárin qazaq mektepteri etý kerek. Ol úshin mektepter ata-analarmen jumys isteýi tiis. «Bári otbasyna bailanysty» deimiz. Biraq otbasyny, adamdy kim tárbieleidi? Ustaz! Ustaz óziniń biliminiń joǵary ekenin ata-ananyń aldynda dáleldeýi tiis. Qazaq tiliniń ultaralyq tilge ainalýy úshin birde-bir qadam jasamai otyrǵan mektepter bar. 50 topta birde-bir qazaq toby joq kolledjder bar. Sondyqtan Bilim jáne ǵylym ministrliginen ótinip suraitynym: tildi jolǵa qoiý úshin tiisti buiryq shyǵarý kerek. Orystildi de, aralas mekteptiń de direktory qazaqsha bilýi kerek. Baiaǵyda bizdiń tusta oryssha bilmegen adamǵa qyzmet bermei qoiǵan. Sondyqtan orys mektepterin aralas, al aralas mektepterdi qazaq mektepterine ainaldyrýymyz kerek», - dep pikirin bildirdi qoǵam qairatkeri.
