Búgin Jazýshylar Odaǵy ǵimaratynda belgili aqyn, qoǵam qairatkeri Orazaqyn Asqarmen qoshtasý rásimi ótti.
Qaraly jiynǵa aqynnyń aǵaiyn-týystary, zamandas dostary, ziialy qaýym ókilderi men qatar atamekeni Jarkentten, Panfilov aýdanynan, Almaty oblysy ákimdiginen arnaiy azamattar kelip, aqtyq saparǵa shyǵaryp saldy.
Qazaqstan Jazýshylar Odaǵynyń basshysy, kórnekti aqyn Ulyqbek Esdaýlet sóz sólep, jyly estelikterin de tilge tiek etti.
T.Q.Júrgenov atyndaǵy QazUÓA rektory Ashat Maemirov Qazaqstan Respýblikasynyń Mádeniet jáne sport ministri Arystanbek Muhamediulynyń jedelhatyn oqyp berdi.
"Qazaqtyń mańdaiyna bitken dara tulǵa, kórnekti qalamger, ult janashyry Orazaqyn Asqar aǵamyz dúnieden ozdy. Ulttyq ádebietimizde óziniń qaitalanbas qoltańbasyn qaldyrǵan talantty sýretker, qazaqtyń birtýar azamaty kelmes saparǵa attandy. Qazaq ádebietiniń qaraly kúni barshańyzǵa qaiǵyryp kóńil aitamyn. Alla aldyńyzdan jarylqasyn, aǵa! Janyńyz jánatta bolsyn", - delingen Mádeniet ministriniń kóńil aitý hatynda.
Aita keteiik, Orazaqyn Asqar 84 jasyna qaraǵan shaǵynda ómirden ótti. Orazaqyn Asqar 1935 jyly 16 mamyrda Shyǵys Túrkistan ólkesiniń Ile aimaǵyna qarasty Múkei Qaratas degen jerde dúniege kelgen. Bastaýysh bilimdi Sarybulaq mektebinde alyp, Qulja qalasyndaǵy «Bilim jurty» dep atalatyn gimnaziiada oqyǵan.
1951 jyly Úrimshi qalasynda ashylǵan Ulttar institýtynyń til jáne ádebiet fakýltetine túsip, onyń ekinshi kýrsyn aiaqtaǵannan keiin «Shyńjań gazeti» redaktsiiasyna qyzmetke turdy. Bul jyldary sol gazetke jáne «Shuǵyla» jýrnalyna óleńderi jii jariialana bastaidy. 1955 jyly atamekeni Qazaqstanǵa kóship kelip, 1961 jyly Qazaq Memlekettik ýniversitetiniń filologiia fakýltetin bitirip shyǵady. 1955 jyly jaryq kórgen «Qos júrek» atty jas aqyndardyń ujymdyq jinaǵyna óleńderi engen.
Biraz jyl Qazaq KSR Ǵylym akademiiasynyń Sh.Ýálihanov atyndaǵy Tarih, etnografiia jáne arheologiia institýtynda kishi ǵylymi qyzmetker, odan keiin Qazaqstan Jazýshylar odaǵynyń kórkem ádebietti nasihattaý biýrosynda nusqaýshy, respýblikalyq Kitap palatasynda bólim meńgerýshisi, «Jalyn» baspasynda aǵa redaktor bolǵan. Qazaqtyń qara óleńin jinap, eki tomyn bastyrdy.
1996 jyldan Qazaqstan Jazýshylar odaǵy basqarmasynyń múshesi. Halyqaralyq «Alash» ádebi syilyǵynyń laýreaty. «Eren eńbegi úshin», «Táýelsizdiktiń 10 jyly» medaldarynyń iegeri. Muqaǵali atyndaǵy syilyqtyń iegeri. Panfilov aýdanynyń Qurmetti azamaty.
