Búgin dúnieden ótken belgili aqyn, qoǵam qairatkeri Orazaqyn Asqardy aqtyq saparǵa shyǵaryp salý rásimi Almatyda ótedi, dep habarlaidy "Ult aqparat".
«Belgili aqyn, qoǵam qairatkeri Orazaqyn Asqardy sońǵy saparǵa shyǵaryp salý rásimi 25 qańtar kúni Almatydaǵy Jazýshylar odaǵynda ótedi. Janaza saǵat 10.00-de bastalady», - dedi QR Mádeniet jáne sport ministrliginiń baspasóz hatshysy Aidar Qyryqbai.
Eske sala ketsek, búgin qazaqtyń belgili aqyny Orazaqyn Asqar 84 jasqa qaraǵan shaǵynda dúnieden ozdy.
Orazaqyn Asqar 1935 jyly Qytai Halyq Respýblikasynyń Ile aimaǵynda dúniege kelgen. Qulja qalasynda gimnaziiany bitirip, Úrimji qalasyndaǵy Ulttar institýtynyń til jáne ádebiet fakýltetine túsken. Qosymsha «Shyńjań gazeti» redaktsiiasyna qyzmetke turǵan. 1955 jyly atamekeni Qazaqstanǵa kóship kelip, 1961 jyly Qazaq memlekettik ýniversitetiniń filologiia fakýltetin bitirip shyǵady.
Biraz jyl Qazaq KSR Ǵylym akademiiasynyń Sh. Ýálihanov atyndaǵy Tarih, etnografiia jáne arheologiia institýtynda kishi ǵylymi qyzmetker, odan keiin Qazaqstan Jazýshylar odaǵynyń kórkem ádebietti nasihattaý biýrosynda nusqaýshy, respýblikalyq Kitap palatasynda bólim meńgerýshisi, «Jalyn» baspasynda aǵa redaktor bolǵan. Jyldar boiy qazaqtyń qara óleńin el ishinen jinap, eki tomyn bastyrdy. «Ádebi mura» baǵdarlamasyna orai, «Álem balalar ádebietiniń» qazaq tilindegi elý tomdyǵyn shyǵarý jumysyna atsalysty.
Aita keteiik, Qazaqstan Respýblikasynyń Mádeniet jáne sport ministri Arystanbek Muhamediuly aqyn, qoǵam qairatkeri, Orazaqyn Asqardyń dúnie salýyna orai kóńil aitty.
"Qazaqtyń mańdaiyna bitken dara tulǵa, kórnekti qalamger, ult janashyry Orazaqyn Asqar aǵamyz dúnieden ozdy. Ulttyq ádebietimizde óziniń qaitalanbas qoltańbasyn qaldyrǵan talantty sýretker, qazaqtyń birtýar azamaty kelmes saparǵa attandy. Qazaq ádebietiniń qaraly kúni barshańyzǵa qaiǵyryp kóńil aitamyn. Alla aldyńyzdan jarylqasyn, aǵa! Janyńyz jánatta bolsyn", - dep jazdy ministr kóńil aitý hatynda.
