Oraza ustaǵan adamǵa vaktsina alýǵa bola ma? Bul saýalǵa Qazaqstan musylmandary dini basqarmasy tóraǵasynyń orynbasary, naib múfti Ershat qajy Ońǵar jaýap berdi, dep habarlaidy QazAqparat.
«Ekpe saldyrýǵa bolatyn, bolmaityny onyń quramyna bailanysty. Ekpeniń quramynda qorektik zat bolmaý kerek. Iaǵni densaýlyq jaǵdaiynda em úshin alatyn vaktsinany alýǵa ruqsat. Demek vaktsina saldyrý Orazany buzbaidy», - dep qysqa jaýap qaitardy naib múfti Ershat qajy Ońǵar Ortalyq kommýnikatsiialar qyzmetinde onlain ótken baspasóz máslihatynda.
Odan bólek, tóraǵa orynbasary pitir sadaqa berýge qatysty pikir bildirdi.
«Biyl pitir sadaqa 500 teńge bolyp belgilendi. Onyń quny 2 keli unnyń naryqtaǵy baǵasymen teńestirildi. Elimizdiń barlyq óńirleri boiynsha unnyń baǵasy suralyp, anyqtaldy. Pitir sadaqa berýge kelsek, ony Oraza bastalǵan kúnnen bastap, 30 kúnniń ishinde ótegen jón. Iaǵni ait merekesine deiin, Oraza kúnderi bergen abzal», - deidi ol.
