Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine kóshi-qon protsesterin retteý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy "Ult aqparat".
Atalǵan zań jobasynyń birinshi oqylymy 2019 jylǵy 11 jeltoqsanda boldy.
Talqylaý barysynda depýtattar tarapynan aitylǵan pikirler eskerile otyryp, zań jobasy odan ári jetildirildi. Zań jobasymen 9 kodekske jáne 21 zańǵa ózgerister men tolyqtyrýlar engizý kózdelip otyr.
«Jaǵymsyzdaý ataýǵa ainalǵan «oralman» sóziniń ornyna, aldaǵy ýaqytta «qandas» ataýy qoldanylatyn bolady. Qandastarymyzǵa elimizde turaqty turýǵa ruqsat alý jáne Qazaqstan azamattyǵyn alý úshin qujattardy bir mezgilde tapsyrý múmkindigin berý qarastyrylyp otyr. Buǵan deiin olar eki ret qujat jinap tapsyrýǵa májbúr edi. Sondai-aq elimizde 183 kúnnen kem turý jáne ákimshilik quqyqbuzýshylyqtardyń bolýy boiynsha zańnamalyq normalar qoldanylmaityn adamdar sanatyna etnikalyq qazaqtardy qosý kózdelip otyr. Bul túzetýde qandastarymyzdyń Qazaqstan azamattyǵyn alýyn jedeldetýge septigin tigizedi», - deidi depýtat Káribai Musyrman zań jobasy boiynsha baiandama jasai otyryp.
Sonymen qatar depýtat shetel azamattaryn Qazaqstan aýmaǵynan shyǵarý tártibin jeńildetý qadamyna toqtaldy.
«Depýtattar eshqandai qujaty joq sheteldik azamattardy elden shyǵarýǵa múmkindik beretin jol júrý qujatyn engizýdi usyndy. Sebebi sottardyń sheshimimen elden shyǵarylýǵa tiisti júzdegen sheteldik eshqandai jaramdy qujatynyń bolmaýyna bailanysty Qazaqstan aýmaǵynan shyǵarylmai, politsiianyń qabyldaý oryndarynda memlekettik biýdjet esebinen tegin turyp jatyr», - dedi K. Musyrman.
Eske sala keteiik, biyl qyrkúiek aiynda Memleket basshysy Qasym-Jomart Toqaev «Oralman» sózinen bas tartyp, «qandas» degenimiz jón bolatynyn aitqan edi.
«Men budan buryn da tarihi otanyna kelgen qazaqtardy «oralman» dep ataýdan bas tartyp, «qandas» degenimiz jón bolady degen edim. Jeti atasyn biletin halyqqa «qandas» degen uǵym jarasady», - dedi Prezident.
