Qazaqstanda "oralman" terminin zańdyq turǵyda qandas degen uǵymǵa aýystyrý josparlanyp otyr. Búgin májilis kóshi-qon protsesterine tolyqtyrýlar men ózgerister engizý týraly zań jobasy birinshi oqylymda maquldady, dep habarlaidy Sputnik Qazaqstan.
"Prezident "oralman" sózine qatysty óz pozitsiiasyn bildirip, termindi "qandas" uǵymymen aýystyrý týraly tapsyrma berdi. Sondyqtan zań jobasynda bul norma kelisilgen. Eger zań bolashaqta qabyldanyp jatsa, "oralman" túsinigi "qandas" sózimen almastyrylady", - dedi eńbek jáne halyqty áleýmettik qorǵaý ministri Birjan Nurymbetov májilis kýlýarynda.
Jýrnalister ministrden "oralman" terminin aýystyrý qajettiligi neden týyndaǵanyn da surady.
"Bul jurtshylyqtyń usynysy bolatyn. Soǵan qaraǵanda, osy jyldar ishinde terminge qatysty oń kózqaras qalyptaspaǵan syńaily. Sol sebepti osyndai tapsyrma berildi. Men ony qoldaimyn", - dedi vedomstvo basshysy.
Osy oraida Nurymbetov ózine qai sóz jaqyn ekenin de aitty.
"Men, máselen, eshqashan oralman dep sóilemeimin. Qandas dep aitamyn. Ol maǵan kishkene jaqyndaý", - dep aǵynan jaryldy ministr.
Aitýynsha, eger zań qabyldansa, onda 10 zań men 7 kodekske ózgeris engiziledi. Iaǵni, "oralman" termini barlyq qujatta "qandas" sózimen almastyrylady.
Májilis depýtattary "oralman" uǵymyn "qandas" dep aýystyrýdy kózdeitin zań jobasyn búgin birinshi oqylymda maquldady.
