«Nur Otan» partiiasynyń «Tegin IT-synyptar» partiialyq jobasy aiasynda ótkizilgen onlain olimpiadanyń jeńimpazdary marapattaldy. Beinekonferentsiia bailanysy rejiminde ótken marapattaý rásimin partiia Hatshysy Tamara Dúisenova ótkizdi.
Jeńimpazdardyń qatarynda oraldyq aǵaiyndy oqýshylar da bar. Partiianyń Batys Qazaqstan oblystyq filialy tóraǵasynyń birinshi orynbasary Serik Súleimenniń aitýynsha, «Tsifrlyq Qazaqstan» baǵdarlamasy boiynsha Elbasy tapsyrmasyna sáikes partiia 20 jobany qolǵa alǵan. Sonyń biri – elimiz boiynsha úsh jyl ishinde tegin 1000 IT-synyp ashý jobasy.
Qazirdiń ózinde elimiz boiynsha 700 IT-synyp, al Batys Qazaqstan oblysynda 15 IT-synyp ashyldy.
– Sonyń úsheýi – Oralda, qalǵandary aýdandarda. Biylǵy jańa oqý jylynan bastap jumys isteitin synyptarda oqýshylardy «STEM Akademiia bolashaq injiniring» kompaniiasy usynǵan baǵdarlamamen robototehnika, baǵdarlamalaý, 3D modeldeý baǵyttary boiynsha, iaǵni halyqaralyq standarttar negizinde oqytady. Partiia men «STEM» kompaniiasy osy IT-synyptarda ne bary úsh ai oqityn balalar arasynda onlain rejimde olimpiada ótkizgen bolatyn.
3D modeldeý baǵyttary boiynsha daryndy balalarǵa arnalǵan mamandandyrylǵan S.Seifýllin atyndaǵy №11 oblystyq qazaq mektep internaty kesheniniń 11 jáne 8-synyp oqýshylary aǵaiyndy Ernar jáne Daniiar Joldyǵali 1-oryndy jeńip aldy. Jeńimpazdarǵa maqtaý qaǵazdary, onlain tegin oqýǵa sertifikattar jáne noýtbýktar tabys etildi.
Olimpiadaǵa barlyq óńirden 5 myńnan astam ul-qyz qatysqanyn eskersek, bul – úlken jetistik. Al Shyńǵyrlaý aýdanyndaǵy L.Qylyshev atyndaǵy orta mekteptiń 8-synyp oqýshylary Táńirbergen Nurislam men Karim Shon, Oraldaǵy oqýshylar jáne jastar saraiyndaǵy IT-synybynyń tárbielenýshisi Arsen Aldabergenov olimpiadada jaqsy nátije kórsetip, onlain tegin oqýǵa sertifikat aldy.
