Oraldyq jas rejisser Maksim Qodarovtyń «Kýb» atty qysqa metrajdy filmi V Niý-Iork Eýraziia kinofestivalinde kórsetilmek, dep habarlaidy «QazAqparat» tilshisi.
Sondai-aq sheteldik kórermender nazaryna Aqan Sataevtyń «Anaǵa aparar jol», Ádilhan Erjanovtyń «Qaratas aýylyndaǵy oba» jáne Ratmir Nazarovtyń «Páter jaldaýshy qyz» atty kartinalary usynylmaq. Filmderdiń kórsetilimderi 16-18 maýsym aralyǵynda Niý-Iorktegi Maroney & Founder's Hall teatrynda ótedi.
2010 jyly Niý-Iork táýelsiz rejisserlar uiymynyń bastamasymen ashylǵan atalmysh festivalǵa orta eseppen álemniń jiyrma elinen seksennen astam kartinany kórsetý jóninde ótinish jasalady eken.
Óziniń otbasy, anasy Oralda turǵanymen, sońǵy birer jyldan beri kino túsirý maqsatynda Almatyda júrgen Maksim Qodarovtyń aitýynsha, «Kýb» filmi «Jeti ata» kompaniiasynyń basshysy Rýslan Tilemisovtiń qoldaýymen 2016 jyly shyǵarylǵan. Sondai-aq ekinshi prodiýser Saiyn Ǵabdýllinniń de eńbegi mol. Qysqa metrajdy filmde oinaityn Janat Nábieva men Ramazan Kópbaev kásibi akterler emes. Kezinde Oraldaǵy Sáken Ǵumarov atyndaǵy balalar kórkem sýret mektebin bitirgen Maksim Qodarovqa film stsenariiin jazýǵa sýretshilik óneri septesken kórinedi. Nebári on toǵyz minýtqa sozylatyn týyndyǵa mýzykalyq mektepte eden jýýshy qyzmetin atqaratyn elý jas shamasyndaǵy skripkashy áieldiń taǵdyry, onyń oryndalmaǵan armandary arqaý bolǵan.
«Shyǵarmashylyq baǵytta budan keiin de jumystanbaqshymyn. Mistika elementteri aralasqan «Joǵalǵan adam» atty taǵy bir qysqa metrajdy filmdi bitirdim. Bolashaqta qazirgi qoǵamǵa qatysty kókeikesti taqyrypta kólemdi kartina túsirýdi qolǵa alsam deimin», dedi Maksim Qodarov.
