Oraldaǵy iri saýda oryndarynyń biri – "Moskovskii" kiim-keshek, zattar satatyn bazarynyń jetpistei satýshysy sanitarlyq dárigermen kezdesýge jinalyp, bazardyń ashylýyn talap etti.
– Karantindi jeńildete bastaǵanda bizge 18 mamyrdan bastap bazarymyz ashylady degen edi. Oblystyq ákimdiktiń ókilderimen hat-habar alysyp, oblystyń bas sanitarlyq dárigeri [Muhamǵali] Aryspaevpen de jeke sóilestim. Biraq barlyq ýádege qaramastan "Moskovskii" bazary áli jabyq, - deidi bazardaǵy oryndardyń birin jalǵa alǵan kásipker Aslan Ótepov.
Ótepovtiń sózinshe, 300-den astam kásipkerdiń shetelden ákelgen maýsymdyq taýarlary turyp qalyp, shyǵynǵa batyp jatyr. Ol karantin kezinde kreditterdi tóleý ýaqyty keiinge shegerilgenin, biraq jaqynda bankter nesieni tóleýdi talap ete bastaitynyn, kóbinde ony tóleitin tabys joǵyn aitady.
- Kóbiniń eki satýshysy bar. Olar eki aýysymmen jumys isteidi. Qazir barlyǵy jalaqysyz qaldy. Úsh aidai boldy, úide tabyssyz otyr, - deidi ol.
Bazardyń ókili Elena Karmeeva "Bazar ashylady dep habarlaǵan soń maska, qolǵap, sanitaizerler satyp alǵan edik. Biraq bizdiń bazar áli jabyq. Tekserýshilerge ne jaqpai qalǵany belgisiz. Bizge birneshe ret tekseris kelip ketken" deidi.
Karmeevanyń sózinshe, bazar iesi de qazir milliondaǵan shyǵynǵa ushyraǵan, sebebi kásipkerlerden jalǵa alý aqshasyn jinap jatqan joq.
Bazar satýshylarymen Oral qalasynyń bas sanitarlyq dárigeri Mádeniet Tanaýov kezdesti. Sózinshe, bazardy ashý úshin maska men qolǵap qory, al ár satýshyda jeke sanitaizer bolý kerek.
- Ár kireberiske barlyq kelýshige arnalǵan ortaq sanitaizer bolý kerek. Al ishindegi oryndardyń ishin jii jeldetip turý kerek. Barlyq dárethanada sabyn, bir ret qoldanylatyn oramal ne qol keptiretin qurylǵy bolýy shart. Osy talaptar oryndalsa, bazar jaqynda ashylýy múmkin. Sanitarlyq dárigerler, satýshylar men ákimdik ókilderi kiretin jumys tobyn jinap jatyrmyz. Olar tekseris júrgizedi. Bir-eki kúnniń ishinde tekseremiz dep oilaimyn. Odan keiin sheshim qabyldaimyz, - dedi ol.
Ótepov jáne taǵy birneshe kásipker sanitarlyq dárigermen kezdesýden keiin oblys ákimi Ǵali Isqalievpen kezdesýge jazylý úshin aimaq ákimdigine bet aldy.
- Eger bizdiń bazar ashylmasa, satýshylar, jalǵa alǵandar jinalyp, ákimdikke baramyz. Ol kezde qatarymyzda júzdegen adam bolady. Biz Konstitýtsiiadaǵy beibit jiyn quqyǵymyzdy paidalanamyz, - dedi Ótepov.
BQO koronavirýs taraýyna bailanysty 30 naýryzdan beri karantin jariialanyp, oblys ishindegi qozǵalysqa shekteý qoiylǵan. Oblystaǵy karantin shekteýleri 12 mamyrdan bastap úsh kezeń boiynsha jeńildetý josparlanǵan. Úshinshi kezeń 25 mamyrǵa belgilengen edi, biraq aimaqta virýs juqtyrǵandar sany kúrt artqandyqtan, karantin 15 maýsymǵa deiin sozyldy.
26 mamyrdaǵy resmi derekke sai, BQO-da 452 adamnan koronavirýs tabyldy. 25 mamyrda 38 adamǵa virýs juqqan. Jergilikti bilik dertke shaldyqqandardyń kóbi Reseiden kelgender dep otyr.
