Oralda jergilikti kásipker Erkin Muhanǵalievti óltirdi degen eki kúdiktige qatysty bultartpaý sharasyn tańdaý boiynsha sot otyrysy ótti, - dep habarlaidy Tengrinews.kz agenttigi "Moi gorod" basylymyna silteme jasap.
Sot otyrysynda tergeýshi 31 jastaǵy Rýslan Qojantaev pen 21 jastaǵy Turlan Amangeldini qamaýǵa alýdy surady. Is materialdaryna súiensek, kúdiktiler "Rahat Lýkým" karaoke meiramhanasy ǵimaratynda mekeme iesi Muhanǵalievpen kezdesken. Olardyń arasynda janjal týyndap, sodan keiin Qojantaev pyshaǵyn shyǵaryp, kásipkerdiń moiyn men keýde tusyna kem degende úsh ret soqqy jasaǵan. Sol kezde Amangeldi pyshaǵyn alyp shyǵyp, qoqan-loqqy kórsetip, mekeme ákimshisine kedergi bolǵan.
"Muhanǵaliev ashyq turǵan terezeden sekirip ketpek bolǵan. Sol kezde Qojantaev onyń beline birneshe ret soqqy bergen. Sosyn jaralanǵan Muhanǵaliev ortalyq stadionǵa qarama-qarsy turǵan kólik turaǵyna júgirgen. Kúdiktiler ony qýyp jetip, Amangeldi ony jerge qulatyp, birneshe ret tepken. Osy kezde Qojantaev júgirip kelip, odan pyshaq suraidy. Amangeldi oǵan pyshaǵyn beredi, ol taǵy alty ret pyshaqtaidy. Muhanǵaliev alǵan jaraqattarynan oqiǵa ornynda qaza bolady. Qojantaev pen Amangeldi qylmys jasaǵan jerden qashyp ketken", - dedi prokýror Tájǵalieva.
Sarapshynyń aitýynsha, Muhanǵalievtiń ólimine moiyn, keýde jáne bel aimaǵyndaǵy pyshaq jaraqattary, sonymen qatar sol jaq uiqy arteriiasy men oń búirektiń zaqymdanýy, mańdai súiekteriniń synýy sebep bolǵan.
"Qojantaev pen Amangeldiniń turaqty tabys kózi joqtyǵyn, asa aýyr qylmys jasaǵanyn, sodan keiin qylmystyq qýdalaý organdarynan jasyrynǵanyn eskere otyryp, olardyń jasyrynýy jáne obektiv tergeýge kedergi keltirýi, jábirlenýshiler men kýágerlerge qysym kórsetýi múmkin ekenine jetkilikti negiz bar. Sottan politsiia bólimi tergeýshisiniń ótinishin qanaǵattandyryp, Qojantaev pen Amangeldini eki aiǵa qamaýǵa alýdy sanktsiialaýdy suraimyn", - dedi memlekettik aiyptaýshy.
Rýslan Qojantaevtyń ózi tergeý dálelderimen kelispedi. Ol eki áieli (bireýi júktiliktiń sońǵy aiynda), balalary jáne úii bar ekenin aitty. Er adam sottan ózin eki aiǵa qamaýǵa almaýdy surady.
Bul rette Turlan Amangeldi sotta Qojantaev qysym kórsetkenin, sol kúni onymen birge barýǵa májbúr bolǵanyn aitty. Eki aiyptalýshynyń da buryn sottylyǵy bolmaǵan. Sýdia sanktsiiasy boiynsha, Qojantaev pen Amangeldi eki aiǵa qamaýǵa alyndy. Tergeý barysynda aiyptalýshy qamaýda bolady.
Eske salaiyq, buǵan deiin Oralda birneshe dámhana men meiramhananyń iesi bolǵan belgili kásipker óltirilgeni habarlanǵan edi. Beinebaqylaý kameralaryna eki jigit qashyp bara jatqany, biriniń qoly qan bolǵany túsip qalǵan.
