Búgin Oral-Frankfýrt baǵytynda alǵashqy ushaq ushty, dep habarlaidy «QazAqparat» tilshisi.
Ár sársenbi saiyn qatynaityn bul tikelei reis BQO ákimdigi men «QPO b.v.» kompaniiasynyń «Air Astana» ulttyq tasymaldaýshy kompaniiasymen júrgizgen kelissózi nátijesinde júzege asty.
Germaniianyń Frankfýrt qalasy iri halyqaralyq kólik beketi ekendigi málim. Endi Eýropa men Amerikaǵa bet alǵan batysqazaqstandyqtar, sondai-aq úiine qaitatyn sheteldik kompaniialar qyzmetkerleri burynǵydai Orynbor men Samaraǵa barmai-aq tikelei ushýǵa múmkindik aldy. Olardy tasymaldaityn Airbus A320 áýe kemesinde ekonom-synypta 132 jáne biznes-synypta 16 oryn bar. Ushý uzaqtyǵy - 4 saǵat 20 minýt. Osy merzim ishinde jolaýshylar bort júiesinde ornatylǵan beineqondyrǵy arqyly kino kórip, mýzyka tyńdap, elektrondy qurylǵylarynan gazet pen jýrnal qarai alady.
Oblys ákiminiń orynbasary Igor Steksov jańa reistiń óńir turǵyndary men kásipkerler úshin qolaily ekendigin, investitsiialyq ahýaldy jaqsarta túsýge septigin tigizetindigin jetkizdi. «QPO b.v.» kompaniiasynyń jobalar boiynsha basqarýshysy Trevor Mandeidiń aitýynsha, Frankfýrt áýejaiynan álemniń kez kelgen núktesine ushýǵa bolady.
Bul tikelei reistiń, ásirese, Astanadaǵy EKSPO-2017 halyqaralyq kórmesi jumys jasap jatqan kezde mańyzy erekshe. Ol Batys Qazaqstan men Batys Eýropa arasyndaǵy úzdik kólik qatynasy bolyp esepteledi.
Aita keteiik, alǵashqy ushaqpen 43 jolaýshy attandy.
