Oral qalasyndaǵy birqatar bazarlarda sanitarlyq talaptar saqtalmai otyr. Bul týraly arnaiy monitoringtik top músheleri júrgizgen reid kezinde belgili boldy, dep habarlaidy "Ult aqparat".
«Altyn alma» jáne temirjol vokzaly aýdanyndaǵy «Mihail» azyq-túlik bazarlaryn teksergen kezde ekeýine ortaq kemshilikterdiń beti ashyldy.
Atap aitqanda, satýshylar betperde ne qolǵap kimese, sonymen qatar satyp alýshylar tarapynan araqashyqtyqty saqtamaý baiqaldy.
Oral qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasy basshysynyń orynbasary Roza Hasenovanyń málim etkenindei, monitoringtik top kún saiyn karantin jaǵdaiynda azyq-túlik bazarlarynda sanitarlyq talaptardyń saqtalýyn qadaǵalaidy. Bári de arnaiy jasalǵan algoritmge sai bolýy tiis. Búgin kóptegen satýshylar eskertýmen qutyldy. Araqashyqtyqty saqtaý óz aldyna, satýshylar men klientter betperdeni durys kimeidi.
Bas memlekettik sanitar dárigeriniń qaýlysy múltiksiz saqtalýy kerek. Mysaly, kókónis pen jemis-jidekten basqa sórede turǵan azyq-túlikterdiń barlyǵy oramada turýy tiis.
«Bazarlarda tártiptiń saqtalýyn baqylaityn jaýapty adam bolýy kerek. Bazar ákimshisi nemese kúzet qyzmeti satyp alýshylar arasynda áleýmettik araqashyqtyqtyń saqtalýyn, saýda ornynyń sanitarlyq óńdeýden ótkizilýin, sondai-aq satýshylar men kelýshilerde jeke qorǵanysh quraldarynyń bolýyn qadaǵalaýy qajet», - dedi R.Hasenova.
«Altyn alma» bazaryndaǵy ashanada da ústelderdiń araqashyqtyǵy saqtalmaǵany, birqatar qyzmetkerlerde betperde men qolǵaptyń joqtyǵy anyqtaldy.
Reid qorytyndysynda «Altyn alma» bazarynyń ákimshiligine eskertý jasalǵanyn aitqan Oral qalasy kásipkerlik jáne aýyl sharýashylyǵy bóliminiń sektor meńgerýshisi Altynbek Nursultanov aldaǵy ýaqytta mundai tekseristerdiń jalǵasatynyn jetkizdi.
«Erteńnen bastap basqarmaǵa túsken ótinishterge sáikes bazarlarda tekserýler júrgiziledi. Tekserý qorytyndysyna sáikes tiisti sheshimder qabyldanatyn bolady», dedi QazAqparat tilshisine Oral qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasynyń basshysy Mádeniet Tanaýov.
Eske sala keteiik, budan buryn BQO-da koronavirýstan kóz jumǵan 79 jastaǵy keiýananyń aýrýy asqynǵansha dárigerge qaralmaǵanyn jazǵan bolatynbyz.
