Oralda «Lexus» markili kóligimen politsiia qyzmetkerlerinen qashyp, kisi qaqqan júrgizýshi ustaldy, dep habarlaidy QazAqparat.
BQO politsiia departamentiniń resmi ókili Bolatbek Belgibekovtiń aitýynsha, oqiǵa 16 sáýir kúni túngi saǵat 23.19-da qalaǵa qarasty Derkól aýylynda boldy.
1987 jylǵy S. degen azamat jalǵan memlekettik nómir taǵyp, «Leksýs LH 470» avtokóliginiń rýline otyrǵan. Politsiia qyzmetkerleriniń «Toqta!» degen zańdy talabyna baǵynbai, qashqan sátte ol rýlge ie bola almai, óz avtokóliginiń janynda turǵan 1987 jylǵy M. degen azamatty qaǵyp ketken.
Politsiia qyzmetkerleri quqyq buzýshyny sol jerde qolǵa túsirdi.
Júrgizýshige qatysty QR Ákimshilik quqyqbuzýshylyq kodeksiniń 610-baby 1-bóligi (múlikterdiń búlinýine alyp kelgen, materialdyq zalal keltirgen kólik quraldary júrgizýshileriniń jol júrisi qaǵidalaryn buzýy), 613-baby 1-bóligi (politsiia qyzmetkeriniń kólik quralyn toqtatý týraly zańdy talabyn oryndamaý), 590-baby 3, 4, 5-bólikteri (kólik quraldaryn paidalaný qaǵidalaryn buzyp, jalǵan memlekettik nómir taǵyp, aidaý) jáne 476-baby 6-bóligi (tótenshe jaǵdai rejimin buzý) boiynsha hattama toltyryldy.
«Júrgizýshige qatysty júrgizilgen meditsinalyq kýálandyrý qorytyndysy 0,44 promildi kórsetken, ol alkogoldik mas bolyp sanalmaidy. Sondyqtan qosymsha saraptama taǵaiyndaldy. Avtokólik arnaiy turaqqa qoiyldy. Avtokólik qaqqan azamat ishtiń jabyq jaraqaty diagnozymen oblystyq aýrýhanaǵa jatqyzyldy», dedi Belgibekov.
