Oralda júk poiyzy er adamdy qaǵyp ketti, dep habarlaidy "Ult aqparat".
QR IIM Kóliktegi politsiia departamentiniń baspasóz qyzmeti málim etkenindei, oqiǵa 12 naýryz kúni keshkisin lokomotiv deposynyń Oral stansasyna kireberis tusynda boldy.
Saǵat 19.05-te Oral stansasy jelilik politsiia bóliminiń kezekshi bólimine júk poiyzynyń adamǵa soqtyǵysýyna bailanysty shuǵyl tejeýdiń qoldanylǵany jóninde habar kelip tústi.
Atalǵan derek Qylmystyq kodekstiń 344-baby 1-bóligi, iaǵni temirjol kóligi júrisi nemese olardy paidalaný qaýipsizdigi qaǵidalaryn buzý boiynsha sotqa deiingi tergep-tekserýdiń biryńǵai tiziliminde tirkeldi.
«Oqiǵa ornyna Oral stansasyndaǵy jelilik politsiia bóliminiń jedel tergeý toby shyqty. Tekserý barysynda Oral qalasynyń turǵyny ekendigi anyqtaldy. Azamatqa qatysty QR Ákimshilik quqyqbuzýshylyq kodeksi 559-baby 5-bóligimen, iaǵni belgilenbegen jerlerde temirjol arqyly ótý boiynsha ákimshilik hattama toltyryldy. Oǵan jedel túrde alǵashqy meditsinalyq kómek kórsetildi. Qazir jaǵdaiy birqalypty», - dep habarlady vedomstvodan.
Oblystyq densaýlyq saqtaý basqarmasy baspasóz qyzmetiniń naqtylaýynsha, jedel járdem saǵat 19.06-da shaqyrylyp, brigada bes minýttan keiin jetti. Mas kúiinde bolǵan 1968 jylǵy er adam oblystyq aýrýhanaǵa jetkizildi. Jaǵdaiy qanaǵattanarlyq, sol aiaǵy kógergen.
