Aqyn, Qazaqstannyń halyq jazýshysy, Memlekettik syilyqtyń iegeri Juban Moldaǵalievke Oral qalasynda eskertkish ornatylady, dep habarlaidy "Ult aqparat".
Oblystyq mádeniet basqarmasy basshysynyń mindetin atqarýshy Sairan Dúisenteginiń aitýynsha, bul shara aqynnyń 100 jyldyǵy aiasynda júzege aspaqshy.
«Qazirgi kezde eskizdik jobalar QR Mádeniet jáne sport ministrligine joldandy. Respýblikalyq komissiia bekitkennen keiin eskertkish ornatý jumystary bastalady. Ony Oraldaǵy Juban baǵynda ornatý kózdelýde. Onda turǵan aqyn músini basqa jerge kóshiriledi», dedi Sairan Dúisentegi.
Juban Moldaǵalievtiń 100 jyldyǵyna arnalǵan negizgi sharalardy qyrkúiek aiynyń aiaǵynda ótkizý josparlanýda.
Halyqaralyq Juban oqýlary, respýblikalyq ǵylymi-tájiribelik konferentsiia, úsh tilde entsiklopediia shyǵarý syndy sharalar júzege asyrylady. Týǵan jeri Aqjaiyq aýdanynda demeýshilerdiń kúshimen Juban ortalyǵyn salý oilastyrylýda.
Juban Moldaǵaliev – Qazaqstan ǵana emes, 1978 jyly KSRO Memlekettik syilyǵyn ielenip, odaqtyq deńgeide de moiyndalǵan aqyn. KSRO jáne Qazaqstannyń Joǵary keńesiniń depýtaty bolǵan ol elimizdiń Jazýshylar odaǵyn da basqardy.
Qylyshynan qan tamǵan keńestik dáýirdiń ózinde «Men – qazaqpyn» dep jar salyp, ataqty poemasyn jazǵan qairatker aqyn 1986 jylǵy Jeltoqsan kóterilisi kezinde buǵyp qalmai, Kolbinge ashy shyndyqty jaiyp salyp, jastarǵa arasha tústi. Juban Moldaǵaliev osy biregei erligimen de el esinde qalatyn bolady.
Qazirgi ýaqytta oblysta J.Moldaǵalievtiń 100 jyldyǵyna orai arnaiy jumys toby jumys jasap jatyr.
Aibarly aqynǵa Oralda ǵana emes, elorda men Almatyda eskertkish ornatý, Halyq qaharmany ataǵyn berý týraly usynystar aitylýda.
Eske sala keteiik, budan buryn Aqsai qalasynda Abaidyń eskertkishi ornatylatynyn jazǵan bolatynbyz.
