Oralda túnde órt shyqqan kópqabatty úiden 83 adam evakýatsiialandy, dep habarlaidy "Ult aqparat".
Batys Qazaqstan oblysy Tótenshe jaǵdai departamentiniń baspasóz qyzmeti málim etkenindei, 18 mamyr kúni saǵat 23.38-de D.Qonaev atyndaǵy shaǵynaýdanda 67-úidiń 3-qabatynda órt shyqqany jóninde 101 telefonyna habar tústi.
Oqiǵa ornyna jetken №1 mamandandyrylǵan órt sóndirý bólimi barlaý júrgizgen kezde toǵyz qabatty úidiń atalǵan páterinde jeke zattar men divannyń jalyn sharpyǵanyn anyqtady. Sondyqtan №2 mamandandyrylǵan órt sóndirý bólimi men jedel qutqarý jasaǵy kómekke shaqyrtyldy.
Jeke quramnyń tez qimyldaýy nátijesinde órt qysqa ýaqytta, 19 mamyrda saǵat 00.15-te oqshaýlanyp, 00.25-te sóndirildi.
Úiden 83 adam qaýipsiz jerge kóshirildi, sonyń 33-i – jasóspirim. Sonyń ishinde 9 bala jedel járdemge tapsyryldy.
Qazirgi kezde órttiń shyǵý sebebi, keltirilgen shyǵyn, kináli adamdar anyqtalyp jatyr.
