Videodan alynǵan kadr, Youtube / Ainýr Kýrmanov
Oralda sý basý qaýpine bailanysty jergilikti aýqymdaǵy tabiǵi sipattaǵy tótenshe jaǵdai rejimi jariialandy, - dep habarlaidy Massaget.kz portaly "Moi gorod" basylymyna silteme jasap.
Muz sýy erip, tasjoldy, jaiaý júrginshiler jolyn, jeke turǵyn úiler men kópqabatty úilerdiń aýlalaryn basqan. Kommýnaldyq qyzmet qyzmetkerleri táýlik boiy jumys istegenimen, mundai sýdy soryp shyǵarý múmkin emes. Qazir Oralda 17 ǵimaratty sý basqan, onyń toǵyzy mektep pen sport nysany, qalǵany - jeke úiler.
Qala ákiminiń orynbasary Jandos Dúisenǵalievtiń aitýynsha, jedel shtab qalada tabiǵi tótenshe jaǵdai rejimin engizý týraly sheshim qabyldaǵan.
"Sý tasqynynyń basty sebebi - topyraqtyń qatýy. 12 naýryzda Sarytaýdyń Svistýn taýy jaǵynan, Saratov tasjolynyń arnasynan jáne Qus fabrikasy aýdanyndaǵy arnada muz eridi. Sý ótkizgishter mundai aǵynǵa tótep bere almady. Sý topyraqqa sińbeidi, óitkeni onyń qatý tereńdigi bir metrden asady jáne sý úsh bilikti kesip ótip, arnasynan asyp ketti. "Sarytaý" yqshamaýdanyndaǵy sý ótkizgish qubyrda sýdyń turyp qalýyna bailanysty Aitqulov kóshesiniń boiyndaǵy joldyń bir bóligi ashyldy, áitpese jeke sektordaǵy úilerdi sý basyp qalýy múmkin edi. Biraq soǵan qaramastan, sý kópqabatty úilerdiń jertólelerin basyp ótken - bul Móńkeuly kóshesiniń boiyndaǵy myńdaǵan adam turatyn segiz úi. Qaýipsizdik úshin olardaǵy elektr qýatyn óshirýge týra keldi. Qazir sýdy soryp, elektr qýatyn berý úshin aianbai eńbek etip jatyrmyz", - dep túsindirdi Jandos Dúisenǵaliev.
Onyń aitýynsha, qazir arnadaǵy sý kólemi azaiǵanymen, tóbelerde áli erimegen qar men muz bar, olar eldi mekenderge qaýip tóndiredi. Áskeri qyzmetshiler kommýnaldyq qyzmet pen qutqarýshylarǵa kómekke keldi.
Sonymen qatar, aýyzsýdyń qysymyn tómendetý týraly sheshim qabyldandy. Jandos Dúisenǵaliev osynyń kesirinen joǵarǵy qabattardaǵy turǵyndarǵa sý jetpei qalýy múmkin ekenin aitty.
"Kárizderdiń jaǵdaiy múshkil, sondyqtan muny isteýge týra keledi. Eki kárizdik sorǵy stantsiiasyn jóndeýge tender ótkizdik, merdigerler anyqtaldy, olar kóktemde jumysqa kirisedi. KSS-18-ge jobalyq-smetalyq qujattama daiyndalyp jatyr, onda da kelesi jyly jumys bastalady. Jóndeýden keiin qalada sýmen jabdyqtaý jáne sý burý máselesi bolmaidy", - dep sendirdi Dúisenǵaliev.
Sonymen birge, Shaǵan jáne Derqul ózenderinde sý deńgeii kóterilip, saiajai turǵyndaryna sý basý qaýpin tóndirdi.
Video: Youtube / Ainýr Kýrmanov
