Oralda Reseiden kelgen júzdegen etnikalyq qazaqqa qandas mártebesi berildi. Biyl tarihi Otanyna kóshkisi kelgender sany aitarlyqtai artqan, - dep habarlaidy Tengrinews.kz agenttigi AstanaTV arnasyna silteme jasap.
Marat Aimuhambetov Oralǵa Orynbor oblysynan kelgen. Kompiýterlik grafika sýretshisi tarihi Otanynyń qarqyndy damýyn kópten baqylap kele jatqanyn aitady. Forým arqyly kóshý úshin qajetti aqparatty jinaǵan.
"Men osynda kóshýdi josparlap júrgen edim, biraq qyrkúiekte shekara jabylyp qalýy múmkin degen qaýesetter kóp boldy. Bul kóshýime múmkindik bolar dep oiladym", - deidi Marat Aimuhambetov.
Er adam áielimen kóship kelgen, Qazaqstanda tek alys týystary bar. Marat sheteldik kompaniiada qashyqtan jumys isteidi jáne jergilikti telearnaǵa jumysqa ornalasqan.
"Men qandas mártebesin alýǵa ótinish berýdi josparlap otyrmyn. Biraq meniń jalaqym jaqsy bolǵandyqtan jáne tólemderdi memleket qamtamasyz etedi, ony jaǵdaiy tómen adamdarǵa qaldyrǵan durys dep oilaimyn", - dedi Marat.
Tarihi Otanyna kóshýge niet bildirgen etnikalyq qazaqtardyń sany aitarlyqtai ósti, deidi oblys biligi.
"Jyl basynan beri BQO-da 232 etnikalyq qazaq qandas mártebesin alýǵa ótinish bildirse, onyń 218-i Resei azamattary. Biyl biz qandastardy qoldaý ortalyǵyn ashtyq, onda adamdar áleýmettik, psihologiialyq jáne zańgerlik kómek ala alady, sonymen qatar memlekettik tildi úirený kýrstary da uiymdastyrylady", - dep túsindirdi Batys Qazaqstan oblysy jumyspen qamtýdy úilestirý jáne áleýmettik baǵdarlamalar basqarmasynyń basshysy Alpamys Kúshkinbaev.
