Batys Qazaqstan oblysynda koronavirýs tabylǵan Oral qalasy turǵynynyń jeke málimetterin jariia etý deregi boiynsha sotqa deiingi tergeý bastaldy, dep habarlady Polisia.kz portaly.
"Áiel Atyraýda issaparmen júrgende aýrý belgilerin sezip, meditsinalyq kómekke júgindi. Ol burynǵy "Kýmyska" shipajaiynda ornalasqan provizorlyq gospitalde bolǵan. Diagnoz rastalǵannan keiin Oral qalasynyń juqpaly aýrýlar aýrýhanasyna aýystyryldy", – delingen habarlamada.
Áleýmettik jelide, sondai-aq, WhatsApp arqyly naýqastyń jeke málimeti, mekenjaiy kórsetilgen aqparat tarap ketken. Qazir politsiia aqparat taratqan adamdy izdep jatyr.
"Bul zańsyz is-áreket qylmystyq quqyqbuzýshylyq bolyp sanalady jáne qylmystyq kodekstiń 147-babynyń 5-bóligine (jeke ómirge qol suǵylmaýshylyqty, Qazaqstan Respýblikasynyń derbes derekter jáne olardy qorǵaý týraly zańnamasyn buzý) jatady. Atalǵan bap boiynsha 7 jylǵa deiingi merzimge bas bostandyǵynan aiyrý jazasy qarastyrylyǵan", – dedi BQO politsiia departamentiniń resmi ókili Bolatbek Belgibekov.
Bul derek sotqa deiingi tergeýdiń biryńǵai tizilimine tirkeldi. Sotqa deiingi tergeýdi Oral qalasy ishki ister departamenti júrgizip jatyr.
Politsiia departamenti azamattardyń jeke málimetteri Konstitýtsiia boiynsha qorǵalatynyn eskertedi. Kináliler qylmystyq jaýapkershilikke tartylady.
Aita keteiik, Batys Qazaqstan oblysynda eki adamnan koronavirýs tabyldy.
Qazaqstan boiynsha naýqastardyń sany 284 adamǵa jetti, 20 adam aýrýdan aiyqty. 64 jastaǵy bir adam kóz jumdy.
Nur-Sultan, Almaty qalalary jáne Shymkentte turǵyn úi alaby karantinge jabyldy. Búginnen bastap Aqtaý, Atyraý jáne Qaraǵandy oblysynyń bes qalasy (Qaraǵandy, Abai, Saran, Temirtaý jáne Shahtinsk) jabyldy. 31 naýryzdan bastap Aqtóbe oblysyna kirýge tyiym salynady. Sondai-aq, Qostanai oblysy óz shekarasyn jaýyp jatyr. Bul óńirde koronavirýs indeti tirkelgen joq.
