Oral qalasynda qaita jańǵyrtýdan ótken Mánshúk Mámetova atyndaǵy halyqaralyq áýejai ǵimaraty paidalanýǵa berildi, dep habarlaidy QazAqparat.
Ǵimarattyń ashylý rásimine qatysqan oblys ákimi Ǵali Esqalievtiń atap ótkenindei, biylǵy naýryzda Úkimet qaýlysyna sáikes áýejaiǵa Keńes Odaǵynyń Batyry Mánshúk Mámetovanyń 100 jyldyǵyna orai qazaqtyń batyr qyzynyń esimi resmi túrde berildi.
«Ǵimarat zamanaýi tehnologiialardy qoldana otyryp, halyqaralyq standarttarǵa sáikes salynǵan. Qazaqstannyń batys qaqpasy sanalatyn Oral qalasynyń áýejai terminaly óńirdegi týrizmniń damýyna, jolaýshylar aǵynyn ulǵaitýǵa, jańa halyqaralyq baǵyttardy ashýǵa, áýe kólikteri arqyly júk ainalymyn arttyrýǵa serpin bermek. Áýejai qurylysyna qarjy bólgen «QPO b.v.» kompaniiasynyń bas direktory Djankarlo Rýiý ózi de qurylysshy bolǵandyqtan, nysanǵa kelip, aqyl-keńesin berip turdy. Qurylysqa qazaqstandyq kompaniialardyń belsene qatysqanyn atap aitý kerek. Osy oraida bas merdiger, «KazConstructionGroup» JShS (bas direktory Muratbek Muhambediev) ujymyna, abattandyrý jáne kógaldandyrý jumystaryna qoldaý kórsetken jeke kásipker Qairat Kárimovke alǵysymdy bildirgim keledi», - dedi óńir basshysy.
QR Indýstriia jáne infraqurylymdyq damý vitse-ministri Berik Kamaliev aldaǵy ýaqytta áýejai sheteldik áýe kompaniialary ushaqtarynyń ushýy úshin «Ashyq aspan» rejimine qosylatynyn, bul sheteldik týrister aǵynyn arttyrýǵa septigin tigizetinin jetkizdi.
Joba quny 6,6 mlrd teńge turatyn halyqaralyq áýejai terminalynyń aýmaǵy 4 500 sharshy metrden 10 myń sharshy metrge deiin ulǵaitylǵan.
Nysanda jolaýshylardyń júkteri men ózin-ózi tirkeýge arnalǵan qurylǵy ornatyldy. Bul saǵatyna 80-nen 400-ge deiin jolaýshyǵa qyzmet kórsetýge múmkindik bermek.
Áýejai arqyly jylyna 600 myńǵa deiin jolaýshy óte alatyn bolady. Sondai-aq Amsterdam, Máskeý, Kiev, Ystanbul, Sankt-Peterbýrg, Ábý-Dabi, Atyraý, Shymkent baǵyttarynda jańadan reister ashý kózdelgen.
Jańa zamanaýi júie engizilgen áýejaidyń aýmaǵy tolyǵymen abattandyrylyp, jolaýshylardyń demalysy men tynyǵýy úshin saiabaq ta salynǵan.
Avtoturaq oryndarynyń sany 30-dan 120-ǵa jetken.
Sonymen qatar jolaýshylardyń kútý zalynda ana men bala, múgedekterge arnalǵan arnaiy bólmeler jasaqtalǵan. Áýejai qurylysyna paidalanylǵan qajetti materialdardyń 60 paiyzy – qazaqstandyq ónim.
Áýejai ázirge tájiribelik paidalaný rejiminde jumys isteitin bolady. Tájiribelik paidalaný kezeńinde barlyq jańa jabdyqtar bir ýaqytta synalmaq.
