Oralda qazaqtyń tuńǵysh ushqysh qyzy, Halyq qaharmany Hiýaz Dospanova atyndaǵy kóshe ashylyp, ózi oqyǵan keshki mektep ǵimaratyna eskertkish taqta ornatyldy, dep habarlaidy "Ult aqparat".
Bul saltanatty sharalar batyr qyzdyń 15 mamyr – týǵan kúnine orailastyryldy.
Aldymen Keńes Odaǵynyń Batyrlary Mánshúk Mámetova, Áliia Moldaǵulova jáne Halyq qaharmany Hiýaz Dospanovaǵa arnalǵan «Qazaqtyń batyr arýlary» músindik kompozitsiiasyna gúl shoqtary qoiyldy.
Saltanatty rásimge qatysqan oblys ákiminiń orynbasary Serik Egizbaevtyń atap ótkenindei, Hiýaz Dospanovanyń esimi Aq Jaiyq óńirimen tyǵyz bailanysty. Batyr qyz Oral qalasynda turyp, osynda bilim aldy. Al maidanǵa Jánibek aýdanynan attandy. Mundai derekterdi keiingi urpaqtyń umytpaýy mańyzdy.
Ekinshi dúniejúzilik soǵystyń ardageri Hamza Safin Hiýaz Dospanovanyń 17 jasynda Oraldaǵy №1 orta mektepti úzdik bitirip qana qoimai, qaladaǵy aeroklýbta ushqyshtyq qadamyn bastap, qan maidanda «qanatty qyz» atanǵanyn tebirene áńgimelep berdi.
«Qazaqtyń qaisar qyzy ushqysh bolamyn dep alǵan betinen qaitpai, Máskeýge attandy. Soǵysta dushpannyń úreiin ushyrǵan batyr qyzdardyń janynan tabylyp, 300-den astam
ret áýege kóterildi. Ushaqtan qulap, mert bola da jazdady.
Aýyr jaraqat alsa da, qaitadan ushaqqa otyrdy. Sóitip Berlinge deiin jetti. Jeńispen elge oralyp, keiin Almaty qalasynda turdy. Biz qaharman qyzdyń erligin árkez este saqtap, osyndai sharalardy ótkizip turýymyz kerek», dedi maidanger.
