Oralda aqtóbelik turǵyn pyshaqtaǵan satýshy áiel jansaqtaý bóliminde jatyr, dep habarlaidy "Ult aqparat".
BQO politsiia departamentiniń resmi ókili Bolatbek Belgibekovtiń málim etkenindei, oqiǵa 9 maýsym kúni shamamen saǵat 23.00-de Zachagan kentindegi azyq-túlik dúkeninde boldy.
Aqtóbe qalasynyń 1984 jylǵy O. degen turǵyny 36 jastaǵy A. esimdi satýshy áielge shabýyl jasaǵan.
BQO politsiia departamentiniń aǵa anyqtaýshysy Altynbek Temirlanov jumystan qaityp kele jatyp, toǵyz qabatty úidiń birinshi qabatynda ornalasqan dúkennen qashyp shyqqan er adamdy, sońynan aiqailaǵan áieldi kóredi. Ol sol boida politsiiaǵa habar berip, ózi qýyp jetip, qarsylyq kórsetkenine qaramai, er adamdy ustaidy. Keiin er adam kelip jetken «Úki» túngi politsiia tobynyń qolyna tústi.
B.Belgibekovtiń aitýynsha, beinebaqylaý kamerasyn qaraǵan kezde O. men A-nyń bir-birimen sózge kelgeni kórinedi. Buǵan ekinshi satýshy men jábirlenýshiniń qyzy kýá bolǵan. O. ekinshi satýshyny iterip jiberip, jábirlenýshini pyshaqtap, dúkennen shyǵyp ketken.
Jábirlenýshi oblystyq kópbeiindi aýrýhananyń jansaqtaý bólimine jatqyzyldy.
«Aldyn ala málimetke qaraǵanda, kúdikti men jábirlenýshi bir-birimen úsh jyldai jaqyn qarym-qatynasta bolǵan. Aqtóbeden birneshe kúnge kezdesýge kelgen. Sodan keiin satýshynyń jumys ornyna baryp, qyzǵanysh negizinde ózimen birge alyp júrgen pyshaqty jumsaǵan. Qylmysty jasaý kezinde ol mas kúiinde bolǵan, buryn sottalmaǵan, esh jerde jumys istemeidi. Tolyq aqparat sotqa deiingi tergeý amaldary aiaqtalǵannan keiin beriledi», dedi Belgibekov.
Qazirgi kezde kúdikti ýaqytsha ustaý izoliatoryna qamaldy.
Oblystyq densaýlyq saqtaý basqarmasynyń baspasóz qyzmeti áieldiń jaǵdaiy aýyr, jansaqtaý bóliminde ekendigin rastady.
