©Pixabay / Andy03
Oral qalasyndaǵy "Aqjaiyq" stadionynda qaiǵyly jaǵdai boldy. Fýtbol oinap júrgen er adam esinen tanyp, kóp uzamai, qaitys boldy, dep habarlaidy Sputnik Qazaqstan agenttigi "Moi gorod" portalyna silteme jasap.
Oblystyq dene shynyqtyrý jáne sport basqarmasy basshysynyń orynbasary Jeńis Nyǵmetýllinniń aitýynsha, stadionda 50 jastan asqan fýtbol ardagerleri arasyndaǵy spartakiada ótken. Alańda Qyzylorda men Túrkistan oblystarynan kelgen komandalar oinady. Saǵat 12:00-diń shamasynda bir oiynshy esinen tanyp qaldy.
"Qyzylorda oblysynan kelgen oiynshynyń jaǵdaiy kúrt nasharlap ketti. Er adam esinen tanyp, qulap qaldy. Oǵan alǵashqy meditsinalyq qyzmet kórsetildi. Alaida, ókinishke qarai, ol qaitys boldy. Júregi syr bergen siiaqty", - deidi Nyǵmetýllin.
Batys Qazaqstan oblystyq densaýlyq saqtaý basqarmasy usynǵan málimetke sáikes, jedel járdem stantsiiasyna saǵat 11:54-te habar túsken. Dárigerler oqiǵa ornyna barǵanda, er adam qaitys bolǵan.
Marqum 59 jasta edi. Sot-meditsinalyq saraptama taǵaiyndaldy. Sol kezde ólimniń naqty sebebi anyqtalady.
