Oralada dúken men aqsha aiyrbastaý pýnktine qaraqshylyq shabýyl jasaǵandar ustaldy, dep habarlaidy "Ult aqparat".
Oral qalasy politsiia basqarmasy bastyǵynyń orynbasary Nurlan Bisenovtiń málim etkenindei, uiymdasqan qylmystyq toptyń eki múshesi aqtóbelik bolsa, bireýi – oraldyq turǵyn.
Qazirgi tańda kúdiktilerge qatysty QR QK 192-baby 2-bóligine (qaraqshylyq), 188-baby 3-bóligi (urlyq) jáne 191-baby 2-bóligine (kisi tonaý) sáikes qylmystyq is qozǵalyp, birqatar saraptama taǵaiyndaldy. Olardyń basqa da qylmystarǵa qatystylyǵy tekserilýde.
N.Bisenovtiń sózine qaraǵanda, biylǵy 21 aqpanda qara betperde kigen belgisiz bireýler Derkól aýylyndaǵy «Tranzit» dúkenine qaraqshylyq shabýyl jasaǵan bolatyn. Satýshyny tapanshaǵa uqsas zatpen qorqytyp, kassadan 75 myń teńgeni alyp ketken. Onymen tynbai, osy ǵimaratta ornalasqan aqsha aiyrbastaý pýnktine kirip, 1,5 mln teńge men noýtbýkti jymqyryp, boi tasalaǵan.
- Qylmystyq top óz áreketin aldyn ala josparlap, aqsha aiyrbastaý pýnktiniń kassirin jumysqa bara jatqanda, urlap áketken. Sonyń kiltimen aqsha aiyrbastaý pýnkti men seifti ashqan. Kassir men satýshyny bailap tastap, mashinada ustaǵan. Politsiia departamenti bastyǵynyń buiryǵymen arnaiy jedel tergeý toby quryldy. Jedel izdestirý jumystary barysynda Aqtóbeden eki kúdikti ustalyp, Oralǵa jetkizildi. Bireýi Oraldan qolǵa tústi. Olar 1979, 1981 jáne 1984 jylǵylar bolyp shyqty, - deidi Bisenov.
Kúdiktilerdiń biri buǵan deiin adam ólimine aparyp soqqan aýyr dene jaraqattaryn salǵany úshin qylmystyq jaýapkershilikke tartylǵan.
Tergeý barysynda zattai aiǵaqtar tárkilendi. Qaraqshylyq shabýyl kezinde olardyń tapansha mýliajyn paidalanǵany anyqtaldy. Al qarjyny óz qajetterine jumsap úlgergen.
