Foto: © AFP 2023 / MARIA ANTONOVA /
Oral qalasynda balasyn qoqys jáshigine tastaǵan áieldiń materialdyq jaǵdaiy tómen bolǵan. Bul týraly Batys Qazaqstan oblysy "Ana úii" qoǵamdyq qorynyń úilestirýshisi Zámzágúl Shkanova aitty, dep habarlaidy Sputnik Qazaqstan.
Nárestesin tastaǵan ananyń úsh balasy bar. Úsheýi de mektep jasyna tolmaǵan. Úshinshi sábiine júkti kezinde "Ana úiiniń" mamandary kómek kórsetken.
"Bizdiń eshkimdi kinálaýǵa haqymyz joq. Taiaqtyń eki ushy bar, áieldiń jaǵdaiyn da oilaý kerek. Ne úshin osyndai dárejege jetti? Úshinshi balasyna aiaǵy aýyr bolǵan kezde kómekteseiikshi dep sheshtim. Ol kezde bizge bul kisiniń sol kezdegi jaǵdaiyn aityp, eriktiler habarlasqan bolatyn. Sol kezde materialdyq jaǵdaiy durys bolmaǵan, kúieýimen, enesimen kelise almai júrgen. Biz psihologiialyq kómek kórsettik", - deidi "Ana úiiniń" úilestirýshisi Zámzágúl Shkanova.
"Ana úii" mamandarynyń aitýynsha, áieldiń densaýlyǵy da durys emes. Al kúieýi din jolyndaǵy adam.
"Ol kishkentaiynan meiirimge zárý bolyp ósken adam. Qazirgi kúni óziniń áke-sheshesimen páter jaldap turady. Kishkentai balasynyń jasy nebári 1,5 jasta. Ol balasynan bas tartatyn ana emes, balasy úshin janyn beretin adam. Eshkimnen demeý kórmei, jany qinalǵan soń amalsyz osy qadamǵa bardy dep oilaimyn. Óitkeni talai ret onyń meiirimdiligin kózimizben kórdik", - deidi Zámzágúl Shkanova.
Qoǵamdyq qor músheleriniń aitýynsha, anaǵa qoldaý kerek.
Aita keteri, Batys Qazaqstan oblysyndaǵy "Ana úii" ashylǵaly 10 jyl ótken, osy ýaqytta 250 ana panalap, keiin aiaǵynan tik turyp, jaqsy ómir súrip ketken. Qazirgi kúni munda 4 ana men 5 bala turyp jatyr.
"Negizi bizge metsenattar óte kóp kómektesedi. Solardyń arqasynda talai ana balasymen birge qaldy. Olar osy mekemege kómektespese qalai bolaryn kim bilsin. Mine dál qazir perzenthanadan taǵy bir anany shyǵaryp alaiyq dep turmyz, óitkeni jigiti aldap tastap ketken, qyz bópesin bosanyp, aýrýhanadan soń qaida bararyn bilmei tur", - deidi "Ana úiiniń" úilestirýshisi.
Zámzágúl Shkanova er adamdar jaýapkershilikten sytylyp ketedi, jaýapsyz ákelerge qatysty zańdy kúsheitý kerek deidi.
