Oralda avtokólik qaǵyp ketken 10 jasar qyz kóz jumdy, dep habarlaidy QazAqparat.
BQO politsiia departamentiniń baspasóz qyzmeti málim etkenindei, oqiǵa 26 qazan kúni shamamen saǵat 10.00-de Ábýbákir Kerderi kóshesi boiynda boldy.
«Toyota Land Cruiser Prado» avtokóliginiń júrgizýshisi, 1974 jylǵy áiel Á.Kerderi kóshesi 136-úi tusynda belgilenbegen jerden joldan júgirip ótpek bolǵan 10 jasar qyzdy qaǵyp ketti.
Túrli jaraqat alǵan qyz oblystyq kópbeiindi aýrýhanaǵa jetkizilgenimen, esin jiia almastan qaitys boldy.
Meditsinalyq kýálandyrýǵa sáikes júrgizýshi ishimdik ishpegen.
Anyqtalǵanyndai, qyz dúkennen úiine jalǵyz qaityp kele jatqan. Ol ekinshi aýysymda 5-synypta oqyp júr eken.
Qazirgi kezde QR QK 345-baby 3-bóligine sáikes sotqa deiingi tergeý amaldary júrgizilýde. Tergeý barysynda tiisti saraptamalar taǵaiyndalatyn bolady.
BQO politsiia departamenti qyzdyń ata-anasy men týysqandaryna kóńil aita otyryp, júrgizýshiler men jaiaý júrginshilerge jol erejesin buljytpai saqtaý kerektigin eske salady.
