© Sputnik / Varvara Gerte
Oral qalasynda aýrýhanaǵa em alýǵa barǵan 36 jastaǵy Ǵabit Ǵumarov komaǵa tústi. Týystary aýrýhana mamandaryn kinálap otyr. Al dárigerler basqasha ýáj aitady, dep habarlaidy Sputnik Qazaqstan Astana TV arnasyna silteme jasap.
13 qazanda mazasy qashqan Ǵabit Ǵumarov jedel járdem shaqyrtqan. Biraq olardyń kómegi qan qysymyn tekserýmen ǵana shektelipti. Jaqyn jerdegi emhana da kovid bolsa ǵana járdemdesemiz dep qaitarǵan. Sodan jaǵdaiy nasharlap ketkennen keiin aýrýhanaǵa barady. Biraq dárigerler de ókpeń qabynyp, sýyq tigen dep, úide emdelýge keńes beripti.
"Balamdy aýrýhanaǵa jatqyz degende alǵan joq. Bir kún bolsa da, aýrýhanaǵa jatqyzý kerek edi. Joq, almaimyz dep balama aiǵailap, qýǵandai etip shyǵaryp saldy. Aiaǵymen kelgen balam koliaskamen shyqty aýrýhanadan", - deidi Balǵanym Ǵumarova.
Ǵabit túnimen qinalyp aýyrǵan soń, anasy ýchaskelik dárigerdi taǵy shaqyrtady. Sol kezde ǵana 36 jastaǵy jigitten insýlt anyqtalǵan. Naýqas dereý jansaqtaý bólimine jatqyzylǵanymen, der kezinde kómek kórsetilmei qalǵan.
"Jai antibiotik berseńiz jazylady dedi. Insýlt alǵanyn baiqamai tur. Jedel járdem de, ýchaskelik dáriger de, oblystyq aýrýhanadaǵy dárigerler de davleniege qarsy eshnárse bergen joq. Qan qysymymen barǵan adamdy qabyldamai, insýlt soqtyryp, qazirgi jaǵdaiy ishemiialyq insýlt bolyp reanimatsiiada jatyr", - dep atap ótti Nazgúl Ǵumarova.
Qazir Ǵabit es-túsin bilmeidi, birneshe kúnnen beri komada jatyr. Al týystary dárigerlerdiń qate diagnoz qoiyp, salǵyrttyq tanytqanyna ókpeli.
Oblystyq densaýlyq saqtaý basqarmasy da dárigerlerdiń insýlt belgisin der kezinde anyqtai almaǵanyn rastap otyr.
"Negizi, insýlttiń belgisin tap basý ońai emes. Qazir osy oqiǵaǵa kináli mamandarǵa sógis berildi. Meditsinalyq kómektiń sapasyn baqylaý komitetine hat joldanyp, dárigerdiń qateligi bar ekeni týraly jaýap alyndy",- dedi basqarmanyń baspasóz hatshysy Aingúl Saqposynova.
Al Ǵabittiń týystary politsiiaǵa aryzdanyp, dárigerlerdi jaýapqa tartýdy talap etti. Baýyrynyń beti beri qaramasa, sotqa beremiz deidi.
