Oral qalasy kásiporyndarynda aptasyna 100 myń dana maska shyǵarý josparlanýda, dep habarlaidy "Ult aqparat".
BQO kásipkerlik jáne indýstriialyq-innovatsiialyq damý basqarmasy basshysynyń orynbasary Janna Bekqalievanyń aitýynsha, bul jumyspen barlyǵy jeti kásiporyn ainalysady.
Olardyń birnesheýi iske kirisip te ketti. Shikizat jetkilikti, Reseiden ákelinýde. Maskalar dárihanalarǵa da beriletin bolady.
«Aptasyna 100 myń dana maska qajettilikti óteidi dep otyrmyz. Material ár túrli. Úsh, bes qabatty maska tigiletindikten, baǵasy da ár túrli», dedi J.Bekqalieva.
Maska tigip jatqan kásiporynnyń biri – «Iagýar» tigin fabrikasynyń direktory Berik Ábilqasovtyń sózine qaraǵanda, tórt kúnde munda 6 myńnan astam maska shyǵarylǵan.
«Biz mekemelerden tapsyrys boiynsha tigip jatyrmyz. Mysaly, «Oraltehservis», «Jaiyq taza qala» JShS, oblystyq politsiia departamenti 1 myń danadan tapsyrys berdi. Barlyǵy 12 adam jumys isteýde, kúnine 1700-dei maska tigiledi. Baǵasy orta eseppen ár danasy 180 teńgeden. Bul maskalardyń bir ereksheligi, ony jýyp, 10-12 ret paidalanýǵa bolady», dedi B.Ábilqasov.
