Oralda qurylysyna biýdjetten 90 million teńge bólingen gúlzar opyrylyp qaldy, - dep habarlaidy kaz.tengrinews.kz jergilikti "Moi gorod" basylymyna silteme jasap.
Jaiaý júrginshilerge arnalǵan gúlzar segiz myń sharshy metr. Ol Oraldyń tórtinshi jáne altynshy yqsham aýdandaryn bailanystyryp tur. Biýdjetten bólingen 90 million teńgege injenerlik jeliler, esik aldylaryna keletin joldar qurylysy, jaiaý júrginshi aimaǵy, jaryqtandyrý, abattandyrý men kógaldandyrý qalpyna keltirilgen bolatyn.
Gúlzardaǵy brýschatka birden birneshe jerde opyryla bastaǵan.
"Bul gúlzarmen № 24 mektep oqýshylary kúnde júredi, kóbi ata-anasynsyz ózderi. Al endi bul jolmen júrý qaýipti. Opyrylyp qalǵan jerlerdi qorshap qoiǵanymen, bul máseleniń sheshimi emes. Ainalyp ótý de qaýipti. Gúlzar ǵana emes, ainalasy da opyrylyp jatyr", - dep narazylyǵyn bildirdi Amina atty Oral turǵyny.
Al Oral qalasynyń Turǵyn úi-kommýnaldyq sharýashylyǵy brýschatkanyń topyraqtyń otyrýynan bolǵanyn aitady.
"Biz baryp kórdik. Búginnen bastap merdiger kepildik mindet negizinde jóndeýge kirisedi. "RemStroiByt" JShS salǵan bolatyn. Kelisimshart boiynsha úsh jylǵa kepil beriledi. Qurylys jumystary kúzde aiaqtalǵan, sýyq kezde, endi qar erip, topyraq otyrǵan siiaqty. Búgin keshke deiin jóndep bitedi", - deidi TKSh bóliminiń basshysy Baýyrjan Týhfatov.
