Foto: instagram.com/zaki_consulting
Oralda 7 jasar bala oiyn alańynda oinap júrip saýsaǵynan aiyryldy. Bul oqiǵa týraly «Ádildik joly» respýblikalyq qoǵamdyq birlestiginiń ókili, qoǵam belsendisi Baýyrjan Ahmetjan jelidegi paraqshasynda habarlady.
Belgili bolǵandai, 6 sáýirde 7 jasar bala Sarytaý shaǵynaýdanyndaǵy alańda oinap júrip, shynashaǵynan aiyrylǵan.
«Syrǵanaqpen oinap jatqanda balanyń saýsaǵy aǵash taqtai men temir qańyltyrdyń arasyna qysylyp qalǵan. Balanyń anasy qoǵam belsendilerine júginip, olar qylmystyq is qozǵaý týraly aryzyn prokýratýraǵa joldady», - deidi Baýyrjan Ahmetjan.
Oqiǵa ornyna jetken qoǵam belsendileri temir tirekterdiń jyljyp ketýine bailanysty temir taqtaidyń astynda sańylaý paida bolǵanyn kórgen. Baýyrjan Ahmetjannyń aitýynsha, sport kesheni 2020 jyly 53,4 million teńgege salynǵan. Kepildik merzimi eki jyl delingen.
«Bul oqiǵaǵa ákimdik kináli dep esepteimiz, olar óz nysandaryn baqylaýsyz qaldyryp, tipti jóndemeidi de. Ata-analar da oiyn jabdyǵyn muqiiat teksermei, balaǵa oinaýǵa ruqsat bergende nemqurailyq tanytady», - deidi ol.
BQO densaýlyq saqtaý basqarmasynyń baspasóz qyzmeti balanyń jedel járdemmen aýrýhanaǵa jetkizilgenin, dárigerler túsken kezdegi jaǵdaiyn ortasha aýyr dep baǵalaǵanyn habarlady. Balanyń saýsaǵy kesilip, dezartikýliatsiialaý otasy jasalǵan.
