Oral turǵyny óldige balaǵan anasyn 28 jyldan keiin tapty. Liýbov Kleimenovany segiz jasynda anasynan alyp ketken, al eki jyldan keiin olar onyń qaitys bolǵany týraly kýálik kórsetken. Sodan beri áiel ákesi men ata-ájesiniń tárbiesinde bolǵan, - dep habarlaidy Massaget.kz portaly "Moi GOROD" basylymyna silteme jasap.
Basylym málimetinshe, Liýbov Kleimenovanyń esinde qiyn balalyq shaǵy týraly estelikter ǵana qalǵan. Áiel anasynyń jylýlyǵy men qamqorlyǵyn ańsap ósken. Anasy Vera Chernoiarovamen ótken sońǵy kún máńgi esinde qalǵan: jaz, ystyq kún, kóshe.
"Anamnyń birinshi nekeden eki balasy boldy, men jáne úlken aǵam. Basqa bireýden taǵy bir uly boldy. Aǵamdy ákem tárbieledi, men segiz jasyma deiin anammen turdym. Bir kúni anam maǵan: "ákeń keldi, sen sonda bolasyń, sosyn seni alyp ketemin" dedi. Sonda men ákemdi birinshi ret kórdim. Ol kezde ákem jazasyn aýylda ótep jatqan, meni sol jerge alyp ketti. Men onymen bir jyl turdym, sodan keiin ol meni ata-anasyna aparyp tastady. Atam men ájem meni qatal tárbieledi, serýendeýge, dostarymdy ákelýge, bireýmen sóilesýge ruqsat bermeitin edi. Baqytty balalyq shaǵym boldy dep aitpas edim", - dedi.
Áieldiń sózinshe, anasynyń týystary alyp ketýge kelgen.
"Men uzaq jyladym, únemi "anam qaida" dep suradym. 11 jasqa tolǵanda maǵan onyń qaitys bolǵany týraly kýálikti kórsetip, onyń endi joǵyn aitty. Men úshin bul úlken soqqy boldy. Úide birge túsken sýretter joq edi, bárin joidy. Sodan beri anam týraly aitýǵa tyiym salyndy", - deidi ol.
Áiel anasynyń qaitys bolǵany týraly kýálikti atasy jasaǵanyn aitty. Aldymen ol ony habar-osharsyz ketti degen, sodan keiin sot arqyly qaitys bolǵany týraly kýálik jasatqan.
Liýbov 17 jasqa deiin atasy men ájesimen birge turǵan. Qazir ol 36 jasta. Jaqynda oǵan "marqum" anasynyń kórshisi qońyraý shalǵan. Osylaisha, ol anasy tiri, biraq soqyr ekenin bilgen. Anasy Reseide Saratov oblysynda qujatsyz turady eken.
"Árine, basynda buǵan senbedim. Alǵash telefonmen sóileskende ekeýimiz de jyladyq. Ol keshirim surap, ómir boiy biz týraly, balalary týraly oilaǵanyn aitty. Ol Reseige ketkenin, ol jerde bir adammen kezdeskenin, sóitip, 25 jyl buryn oǵan turmysqa shyqqanyn aitty. Qazir ol qaitys bolǵan, al anam qujatsyz, zeinetaqysyz jáne múgedektigi boiynsha járdemaqysyz ómir súredi. Menen qujattaryn qalpyna keltirýge kómektesýimdi ótindi", - dep túsindirdi Liýbov Kleimenova.
Oral qalalyq AHAJ-da Chernoiarova týraly derekter saqtalǵan. Vedomstvo málimetinshe, ol 1966 jyly 14 jeltoqsanda Oralda dúniege kelgen. Sondai-aq, 2001 jylǵy 4 maýsymdaǵy sot sheshimi boiynsha qaitys bolǵany týraly derekter bar.
"Veraǵa kóshi-qon qyzmetiniń qyzmetkerleri arqyly Reseiden Oraldyń AHAJ-na suraý salý qajet. Aldymen onyń qaitys bolǵany týraly derekti joiý kerek (muny qaiyn atasy sotta jasai alady), sodan keiin biz onyń týý týraly kýáligin qalpyna keltire alamyz. Tek qajet anyqtamalardy alǵannan keiin ǵana ol shekaradan ótip, Oralǵa kelip, qalǵan qujattardy qalpyna keltire alady", - dep túsindirdi AHAJ qyzmetkeri.
Áiel qazir baspanasyz qalǵanyn aitady. Onyń qujattary órtenip ketken, keiin olardy qalpyna keltirmegen. Ómir boiy beiresmi jumys istegen. Qazir kózine operatsiia qajet eken.
"Men balalarymdy birneshe ret qaitarýǵa tyrystym, olar maǵan bermedi. Sodan keiin úmitimdi úzip, Reseige kettim, ol jerde bir adammen kezdesip, soǵan turmysqa shyqtym. Maǵan da uiat, óz is-áreketterimdi aqtamaimyn", - dedi Vera.
