Oral transformator zaýyty «Bolashaq» qaýymdastyǵy keńesi músheleriniń qoldaýymen tótenshe jaǵdai kezinde qiyn jaǵdaiǵa tap bolǵan otbasylarǵa 2,5 mln teńge bóldi, dep habarlaidy "Ult aqparat".
BQO boiynsha «Bolashaq» qaýymdastyǵynyń tóraiymy Saltanat Tumanbaevanyń aitýynsha, budan buryn atalǵan kásiporyn az qamtylǵan 60 otbasyǵa, sonyń ishinde osy transformator zaýytynda jumys jasaityndarǵa qaiyrymdylyq kómegin kórsetken edi.
25 sáýir, senbi kúni aldymen «Shańyraq» jasóspirimder úiindegi 64 otbasyǵa qoldaý jasaldy.
Oǵan qosa qaýymdastyq eriktileri qaladaǵy az qamtylǵan 136 úidi aralap, azyq-túlik sebetin tabys etti.
Osylaisha barlyǵy 200 otbasyǵa járdem berildi.
Azyq-túlik sebetine asa qajetti taýarlarmen qatar turmystyq tazalaǵysh zattar men jeke gigiena quraldary kiredi. Oǵan qosa «Shańyraq» jasóspirimder úiine sonda turatyn balalardyń onlain sabaǵyn oqýyna qajetti teledidar syiǵa tartyldy.
Aita ketken jón, quramyna «Oral transformator zaýyty» JShS kiretin «Alageum Electric» kompaniialar toby koronavirýs indetimen kúreske 100 mln teńge qarastyrdy. Sonyń ishinde «Birgemiz» respýblikalyq qoryna jáne elimizdiń ózge óńirlerine qarajat bólindi.
Eske sala keteiik, budan buryn Batys Qazaqstanda 1400-ge jýyq adamnyń úide oqshaýlanǵanyn jazǵan bolatynbyz.
