"Aeroporty regionov" BK qazaqstandyq seriktesterimen birlesip, Mánshúk Mámetova atyndaǵy Oral halyqaralyq áýejaiynyń operator kompaniiasy - "Oral "halyqaralyq áýejaiy" JShS-ny satyp alý jónindegi kelisimshartqa otyrdy, dep habarlaidy Zakon.kz.
RBK málimetinshe, áýejaidyń jylyna qamtityn jolaýshylar aǵyny 300 myń adamnan asady. Reseilik holding ony tranzittik hab retinde damytýǵa nietti.
"Áýejaidyń Qazaqstannyń soltústik-batysynda, bizge yńǵaily ornalasýy munda tranzittik tasymaldardy júzege asyrýǵa jáne onyń bazasynda óńirlik hab qalyptastyrýǵa múmkindik beredi. Jańa investordyń kelýi jáne jetekshi áýejai kompaniiasynyń quzyretterin engizý áýe torabyn odan ári damytý úshin eleýli perspektivalar týdyrady", delingen kompaniia habarlamasynda.
Sondai-aq, kompaniia 2022 jyly Oral qalasynda jańa jolaýshylar terminaly salynǵanyn atap ótken. Sondyqtan investitsiia negizinen arnaiy tehnikaǵa, tehnologiialarǵa jáne servisterge baǵyttalmaq.
"Oral "halyqaralyq áýejaiy" JShS-nyń menshik ieleri reseilik "Retrans" AQ, "Oral menedjment" JShS jáne qazaqstandyq kásipker Dáýlethan Qilybaev bolyp tabylady.
"Ýralskaia nedelia" basylymynyń dereginshe, "Oral menedjment" JShS Sergei Artiýginge tiesili. Sondai-aq onyń kún energiiasymen ainalysatyn Caspian Solar degen kompaniiasy da bar. Al Dáýlethan Qilybaev Qazaqstan damý bankinde, "QazAzot" AQ-da basshylyq qyzmetter atqarǵan.
"Aeroporty regionov" BK - RF territoriiasyndaǵy óńirlik áýejailardy basqarýdy júzege asyratyn Resei áýejai holdingi. Qazirgi ýaqytta holdingke kelesi áýejailar kiredi:
- "Koltsovo" áýejaiy (Ekaterinbýrg q.),
- "Kýrýmoch" áýejaiy (Samara q.),
- "Chkalov" áýejaiy (Nijnii Novgorod q.),
- "Platov" áýejaiy (Rostov-na-Doný q.),
- "Gagarin" áýejaiy (Saratov q.),
- "Elizovo" áýejaiy (Petropavl q.-Kamchatskii),
- "Novyi Ýrengoi" áýejaiy (Novyi Ýrengoi q.),
- "Remezov" áýejaiy (Tobolsk q.).
Bas direktory - Evgenii Chýdnovskii. Kompaniianyń shtab-páteri Máskeýde ornalasqan.
