Foto: Polisia.kz
Oral qalasynyń 33 jastaǵy turǵyny shetelge baryp, búiregin satpaq bolǵan, – dep habarlaidy "Ult aqparat" Polisia.kz saityna silteme jasap.
Er adam otany Keniia Respýblikasynda jasatý boiynsha mámile jasasqan.
"30 shildede BQO PD uiymdasqan qylmysqa qarsy kúres basqarmasy Kóliktegi PD UQQKB qyzmetkerlerimen birlesip, IIM-niń uiymdasqan qylmysqa qarsy kúres departamentiniń úilestirýimen adam organdaryn satý áreketin toqtatty" - delingen habarlamada.
Oral qalasynyń 33 jastaǵy A. esimdi turǵyny otbasyly azamat ekeni jáne vahtalyq ádispen jumys isteitini anyqtalǵan. Ol aqshalai qarajattyń jetispeýshiligine bailanysty óziniń búiregin satpaq bolǵan.
Atalǵan azamat mamyr aiynda halyqaralyq internet-saitta jariialanǵan aqshalai syiaqy úshin transplantatsiiaǵa arnalǵan búirekti satý týraly habarlandyrýdy kórgen. Oǵan Telegram kanaly arqyly sait qyzmetkerleri bailanysqa shyqqan. Olar ortaq mámilege kelý arqyly quny 20 myń AQSh dollaryn quraityn otany Keniia Respýblikasynda jasaýǵa kelisken. A. esimdi er adam 2 ai boiy meditsinalyq ortalyqtarda tapsyrǵan taldaý nátijelerin Telegram kanaly arqyly jiberip otyrǵan. Sait qyzmetkerleri oǵan jol júrý bileti jáne elektrondy viza úshin 250 AQSh dollary kóleminde aqsha jibergen.
"Politsiia qyzmetkerleri atalǵan azamatty 30 shildede Almaty qalasyndaǵy áýejaidyń ushý aimaǵynda ustady. Tergeý amaldaryn júrgizý úshin er adam Oral qalasyna jetkizildi, oǵan eshqaida ketpeý týraly qolhat berildi.
Atalǵan derek boiynsha QR QK-niń 116-baby 1-bóligine sáikes, sotqa deiingi tergeý amaldary júrgizilip jatyr" - delingen habarlamada.
Aita keteiik, Qazaqstanda organdardy satýǵa tyiym salynady jáne transplantatsiia jasaýdyń jalǵyz joly — patsienttiń týysynyń óteýsiz berýi nemese qaitys bolǵan adamnyń organyn týystarynyń kelisimimen alý.
