Oral qalasynda balabaqshalardyń qyzmeti qaita toqtatyldy, dep habarlaidy "Ult aqparat".
Buǵan deiin habarlaǵanymyzdai, BQO taýarlar men kórsetiletin qyzmetterdiń sapasy men qaýipsizdigin baqylaý departamenti óńirde koronavirýsqa shaldyǵý deńgeiiniń tómendemeýine bailanysty karantin merzimin 15 maýsymǵa deiin uzartqan bolatyn.
Qalalyq bilim berý bóliminen túsken málimetke qaraǵanda, jaǵdaidyń kúrdeliligin eskere otyryp, balalardyń qaýipsizdigi úshin qala ákimdigi janyndaǵy jedel shtabtyń 24 mamyrdaǵy otyrysy negizinde karantin rejimi aiaqtalǵansha barlyq menshik túrindegi balabaqshalardyń qyzmetin toqtatý týraly sheshim qabyldandy.
Bólim basshysy Aqjarqyn Temirhanovanyń aitýynsha, oblys ortalyǵynda 50 balabaqsha bar. Balabaqshalar buǵan deiin 20 mamyrda qyzmetin bastap, úsh kún boiy búldirshinderdi qabyldaǵan edi.
Eske sala keteiik, búgin tańdaǵy málimet boiynsha Batys Qazaqstan oblysynda taǵy 16 adam koronavirýs juqtyryp, ósim deńgeii 4,3 paiyzdy qurady.
