Oralda «Bilim servis» atty jańa kommýnaldyq memlekettik mekeme quryldy, dep habarlaidy "Ult aqparat".
Mekeme basshysy Murat Baimenovtiń aitýynsha, «Bilim servis» bilim salasynda býhgalterlik esep júrgizý jáne tehnikalyq máselelerdi sheshýmen ainalysatyn bolady.
Buǵan deiin qaladaǵy 50 orta mekteptiń árqaisysynda birneshe býhgalterden boldy.
2017-2018 jyldary respýblika boiynsha bilim salasynda 9500 tekserý júrgizilgen. Sonyń 80 paiyzynda buzýshylyq derekteri anyqtalǵan joq. Alaida mektep direktorlarynyń qujattardy kórsetip, túsindirýge kóp ýaqyty ketti. Budan bulai olar mektepti jóndeý, sharýashylyq jumystaryna bas aýyrtpaityn bolady.
«Tehnikalyq qyzmetkerlerdi bizder qabyldaityn bolamyz. Olar bizde shtatta bolǵanymen, mektepterde jumys jasaidy. Jedel toptar qurylyp, mektepterden túsken usynysqa sáikes buzylǵan nárselerdi retke keltiredi. Bul 180 mln teńgeni únemdeýge múmkindik beredi», deidi M.Baimenov.
Jańa mekeme aldaǵy jyldyń basynan jumysyn bastamaqshy.
Onyń sózine qaraǵanda, jańa mekeme apparatynda 50 býhgalter, 10 ekonomist jumys jasaityn bolady. Olar bilim salasynda jasaǵandar ishinen iriktelip alynady. Sondyqtan býhgalterler, elektrikter, santehnikter jáne basqa mamandar arasynan 226-dai adam qysqartylady. Olardy jumysqa ornalastyrýmen, qajet bolǵan jaǵdaida qaita oqytýmen qala ákimdigi ainalysady.
Buǵan riza bolmaǵan qala mektepteriniń býhgalterleri kásipodaqqa júgindi.
Oblystyq bilim jáne ǵylym qyzmetkerleri kásipodaǵy uiymynyń tóraǵasy Marat Daýpaev máseleniń ońtaily sheshilýi úshin jumystanyp jatqandyǵyn jetkizdi.
«Osynshama adamnyń qysqarýy ońai emes. Bári zań boiynsha bolýy tiis. Biz osy máseleni «Qazaqstandyq salalyq bilim jáne ǵylym qyzmetkerleriniń kásiptik odaǵy» qoǵamdyq birlestiginiń nazaryna usynbaqshymyz.
Oblystyq bilim basqarmasy basshysynyń qatysýymen qala ákiminde bolyp, óz usynysymyzdy bildirdik. Qala mektepteriniń direktorlarymen de kezdesemiz. Jalpy Qazaqstan boiynsha qolǵa alynyp jatyrǵan másele emes. Sondyqtan munyń jergilikti jerde ońtaily sheshilýi biz úshin de mańyzdy», dedi M.Daýpaev.
