Energetika ministri Qanat Bozymbaev Munai eksporttaýshy elder uiymynyń (OPEK) sheshimderine jáne ol uiymdy qajet etpeitin elderdiń ustanymyna qatysty pikirin bildirdi, dep habarlaidy QazAqparat tilshisi.
«OPEK-ti jabý degen ońai bolmaityn shyǵar. Óitkeni, munai óndiretin memleketter ony baiaǵyda qurǵan. Álbette, álem naryǵynda ártúrli pikirtalas bolady. OPEK-ke kirmeitin elder boiynsha kelesi jyly, bálkim, jańa kelisimge keletin shyǵarmyz. Bul másele munai salasyndaǵy jalpy úilesim ideiasyn paidalanýǵa múmkindik beredi. Óitkeni, úilesim bolmasa, kúni erteń óndiris qatty ósip ketse, onda munai baǵasy tómendeýi múmkin», - dedi Qanat Bozymbaev OKQ-da ótken baspasóz máslihatynda.
Ministrdiń aitýyna qaraǵanda, osy sebepti úilesim de, OPEK te bolýy kerek.
«Resei, Meksika, Ázerbaijanmen qarym-qatynas qurylyp, úilese jumys atqarylýy tiis. Bizde de osyndai turaqty rejim ári turaqty baǵa bolýy kerek», - dedi Qanat Bozymbav.
Eske sala ketsek, QR Energetika ministri Qanat Bozymbaev osy aidyń basynda OPEK+ kelisimine qatysýshy elder ministrleriniń 5-shi otyrysyna qatysqan bolatyn.
«Jiyn qorytyndysy boiynsha, munai óndirisiniń kólemin 6 aiǵa shekteý týraly kelisim jasaldy. Kelisim kúshi 2019 jyldyń qańtar aiynan bastalmaq. Bul sheshim OPEK-ke múshe elderdiń qara altyndy óndirý kólemin táýligine 1,2 mln barrelge nemese árbir el úshin 2-den 2,5%-ǵa deiin tómendetýdi kózdeidi», - dep habarlaǵan edi Energetika ministrligi.
