Ońtústik Koreiada koronavirýs juqtyrǵan 376 jańa jaǵdai anyqtaldy. Elde virýs juqtyrǵandardyń jalpy sany 3 526 adamǵa jetti, dep habarlaidy Yonhap agenttigi.
Elde virýstan 17 adam kóz jumdy.
Koreia aýrýdy baqylaý jáne aldyn alý ortalyǵynyń (KCDC) málimetine sáikes, virýs juqtyrǵan 376 jańa jaǵdaidyń 333-i Seýlden ońtústik-shyǵysqa qarai 300 shaqyrym jerde ornalasqan Tegý qalasynda tirkelse, 26-sy – kórshiles Soltústik Kionsando provintsiiasynda.
Sondai-aq ózge de iri provintsiialar men qalalarda aýrý juqtyrǵan birneshe jaǵdai týraly habarlandy. Seýlde taǵy bes adam infektsiiany juqtyrǵan. Sonymen qatar úlkendigi jaǵynan Ońtústik Koreianyń ekinshi qalasy Pýsanda da bir turǵynnan virýs tabylǵan.
Elde tirkelgen infektsiianyń 87 paiyzdan astamy Tegý qalasy men Soltústik Kionsando provintsiiasyna tiesili.
Aldaǵy kúnderi Ońtústik Koreiada virýs juqtyrǵandardyń sany artýy múmkin, óitkeni densaýlyq saqtaý organdary 210 myńnan astam Iisýs Sinchhondji shirkeýiniń (Shincheonji Church of Jesus) múshesin tekserýdi bastady.
Densaýlyq saqtaý organdary eldegi infektsiia juqtyrýdyń jartysynan astamy jergilikti dini sekta Sinchhondjige (Shincheonji) qatysty dep kúdiktenip otyr.
Jeksenbi kúni tańerteń Ońtústik Koreiada 32 422 adam tekserýden ótip jatyr Jalpy 61 037 adamnyń taldaýy teris nátije kórsetti. Saýyǵyp shyqqandar sany 30-ǵa jetti.
Ońtústik Koreia elinde koronavirýs alǵash ret 20 qańtarda tirkeldi. Ol kezde virýs órship turǵan Ýhannan kelgen Qytai azamatshasynyń testinen virýs tabyldy.
Buǵan deiin habarlaǵandai, 1 naýryzdan bastap koronavirýsqa bailanysty Qazaqstan Ońtústik Koreiaǵa ushatyn áýe reisteriniń sanyn qysqartty. Sondai-aq, Qazaqstan elshiligi osy elde júrgen qazaqstandyqtardyń tizimin jasai bastady.
