Teriskeige ońtústikten bet alǵan uly kósh qaitar joldyń qamyna kiristi. Óitkeni, jumys qoly tapshy Soltústik Qazaqstan oblysyna arnaiy baǵdarlama boiynsha kóship kelgen otbasylar osy ýaqytqa deiin ne baspanamen, ne jumyspen qamtylmaǵan.
Turmysy tómendep ketken olarǵa teriskeidiń 9 ai qysy da qinap tur. Tityqtaǵan jurt endi býynyp-túiinip elge oralaiyn dese, ol jaqtaǵy aǵaiynnyń mazaǵyna ainalamyz dep alańdaidy.
40 jastaǵy Nurlybek Myrzahmetov byltyr 4 balasymen Shymkentten kóship kelgen. Mamliýt aýdany Pokrovka aýylyndaǵy myna eski úidi aiyna 5 myń teńgege jaldap otyr. «Jaldap otyr» degen aty ǵana. Alǵashqy eki aiyn ǵana tólegen ol qazir úi iesine 50 myń teńge qaryz. Kelinshegi jumyssyz. Ózi jýyrda ǵana mektepke ot jaǵýshy bolyp ornalasypty. Ailyǵy – 40 myń. Osyndai otbasylardyń jaiyna byltyr uly kóshti bastap kelgen Baizaq aqsaqal qatty alańdaidy.
«Aýdan, oblys jaǵynan eshqandai kómek kórsetken joq. Úi alyp bermedi jáne olardyń kiim -keshegine eshqandai jetpedi. Bul jerdiń qysy sýyq bolǵannan keiin otyn kerek, kómir kerek. Qazir qalǵan úsh otbasy qinalyp otyr», - deidi Pokrovka aýylynyń turǵyny Baizaq Bókenbaev.
Al Ońtústik Qazaqstan oblysynyń Jetisai aýdanynan kelgen Ermahan Baizaquly áke-sheshemniń zeinetaqysy bolmasa ash qalar edim deidi. Kelinshegi 45 myń teńgeniń jumysyn áreń taýypty. «Dene shynyqtyrý» sabaǵynyń ustazy degen bildei diplomy bola tura ózi úide jumyssyz. Olar da byltyr bir jyl boiy ózi siiaqtylarmen birlesip, 17 adam shaǵyn úidi panalaǵan.
«Úi alyp beremin, jumysqa kirgizemin, mal sharýashalyǵynyń ainalysatyndarǵa nesie alyp bermiz, degen soń kelip edik. Elimizge ketemiz endi», - deidi Pokrovka aýylynyń turǵyny Ermahan Baizaquly.
Aýdan ákiminiń turǵyndar aldynda esebi bolady degendi estigen jurt nazyn arqalap osynda jetti. Sheneýnikterdiń aitýynsha, byltyr aýdanǵa 8 úi satyp alýǵa aqsha bólingen eken. Biraq birde-bir baspana alynbapty. Bárine sol úilerdiń burynǵy ieleriniń salǵyrttyǵy sebep dep otyr.
«Úkimettiń aqshasyn konkýrs ótkizip, beredi ǵoi. Aqshasyn bóldik. Biraq tapsyrǵan qujattary durys bolǵan joq. Bireýiniń tehpasporty joq. Bireýiniń tirkeýi joq», - deidi Mamliýt aýdanynyń ákimi Erbolat Bekshenov.
Byltyr Mamliýt aýdanyna ońtústikten 14 otbasy qonys aýdarǵan eken. Biri osyndai ýaqytsha qiyndyqqa tózbese, biri teriskeidi jersinbepti. Saldarynan úsh otbasy ońtúsikkke qaita kóship ketken. Qalǵandarynyń jaǵdaiyn jasamasa, úkimettiń bildei baǵdarlamasymen kelgen jurttyń da jazǵa qarai jolǵa qamdanýy ábden múmkin.
