Ońtústikten soltústikke kóshetinderge arzan baspana beriledi. Atalǵan bastama ázirshe pilottyq rejimde qolǵa alynyp otyr, dep xabarlaidy "Ult aqparat".
QR Eńbek jáne xalyqty áleýmettik qorǵaý vitse-ministri Nurjan Áltaevtyń aitýynsha, qazirgi kezde baspana jaldaý úshin bir jylǵa deiin aqsha beriledi. Degenmen, adamdardyń baspana máselesi túbegeili sheshilip otyrǵan joq.
"Sol sebepti biyl biz Soltústik Qazaqstan oblysynda pilottyq jobany bastap jatyrmyz. Ol jaqqa ońtústikten jyl saiyn myń otbasy kóship otyrady. Sol azamattar úshin jańa úiler salynady. Osy bastamaǵa biýdjetten aqsha qarastyrylyp jatyr. Ony iske asyrý tetikterin de qarastyrýdamyz. Josparǵa sáikes, soltústikke kóshkender úidi jalǵa alyp, ai saiyn aqy tóleidi. Aqynyń mólsheri kóp bolmaidy. Úi 15 jylǵa jalǵa beriledi. Alaida bes jyldyń ishinde ony jeke menshikke satyp alýǵa bolady", - dedi N.Áltaev Astanada ótken baspasóz máslixatynda.
Onyń sózine qaraǵanda, atalǵan bastama sátti júzege assa, ondai úiler Pavlodar, Qostanai jáne Shyǵys Qazaqstan oblystarynda salynady.
"Resmi málimetke sáikes, ótken jyly Ońtústik Qazaqstan, Jambyl, Qyzylorda, Mańǵystaý jáne Almaty oblystarynan soltústikke 1 200-den astam otbasy kóship bardy. Biyl biz atalǵan kórsetkishti 1 706 otbasyǵa deiin arttyrýdy kózdeimiz. Ol - shamamen 7 119 adam. Osy adamdardyń bir bóligi jeke menshik kásiporyndarda eńbek etedi. Ol jerde jumys oryndary daiyn. Ekinshi bóligi biýdjettik salaǵa barady. Óitkeni onda da maman tapshylyǵy bar. Qalǵany biznespen ainalysatyn bolady. Olarǵa jer de, shaǵyn nesie de beriledi", - dep atap kórsetti N.Áltaev.
Aita keteiik, búgingi baspasóz máslixatynda ministr Ábilqasymova oralmandardyń eńbek ótilin esepteý máselesi boiynsha túsinik berdi. Onyń aitýynsha, kelesi jyldan bastap elimizde biryńǵai jiyntyq tólem engiziledi.
