Ońtústikten Soltústikke biyl 900-dei otbasy kóshýdi josparlap otyr. Memleket qoldaýymen qolǵa alynǵan baǵdarlama boiynsha ótken jyly 250 otbasy qonys aýdarǵan bolatyn. Sóitip teriskeidegi elge el qosylyp, jumys kúshi tolyqtyryldy. Osyndai jetistikke kóńili tolǵan soltústiktegi aimaq ókilderi biyl halqy tyǵyz ornalasqan Maqtaral jurtymen kezdesip, bos jumys oryndarynyń jármeńkesin uiymdastyrdy, dep habarlaidy Ult.kz tilshisi QazAqparat agenttigine silteme jasap.
«Serpin» - elge serpin beretin joba. Elbasy Joldaýyndaǵy eńbek naryǵyn damytý boiynsha qolǵa alynǵan is osylaisha qarqyn ala bastady.
«Maqtaral óńirimizdegi halqy tyǵyz aýdan bolǵandyqtan, kezdesýdi osy aýmaqtan bastadyq. 3 kúndik óńiraralyq seminar ótkizip, sońy jármeńkege ulasty. Aimaqaralyq ekonomikalyq qarym-qatynasty arttyrý úshin delegatsiia quramynda biznes ókilderi de kelip otyr. 636 jumys berýshi bas-aiaǵy 1785 bos jumys ornyn usynýda», - dedi oblys ákiminiń orynbasary Erbol Sadyr.
Maqtaralda búginde 350 myńǵa jýyq halyq turady. Sonyń 8 myńdaiy jumyssyz. Al, turǵyn úi kezegine 300 azamat tirkelgen. Sondyqtan shalǵaidaǵy aýdan turǵyndaryna Soltústikke kóshý tiimdi bolmaq.
«Aýdanda jylyna on myńǵa jýyq sábi ómirge keledi. Úi berse, árine barady. Ol jaq agrarly aimaq bolǵan soń, osy baǵyttaǵy jumysshylar óte qajet. Sondai-aq, muǵalimder, densaýlyq saqtaý salalarynda da maman tapshy eken», - deidi Maqtaral aýdany ákiminiń orynbasary Altyn Eshanqulova.
Soltústik Qazaqstan oblysynan kelgen kásipkerler bolsa, jeke sharýa qojalyqtaryna jumysshylar tapshy ekenin aityp otyr. Ásirese, mal baǵyp, tórt túlikke kútim jasaityn sharýalar qajettiligi týyndaǵan.
«Maldy baǵyp, onyń sútin, etin satamyz. Úimen qamtamasyz etemiz. Azyq-túligi tegin. Ekeýara kelisip, nesiege ózine de mal alsyn. Sóitip, qora bar, jai bar. Ekeýmizge de jetedi. Malyn kóbeitsin. Ailyq tóleimiz», - deidi jeke kásipker Erlan Dúisenov.
