«Uly Jibek joly eskertkishteri» atalymy boiynsha 8 eskertkish Ońtústik Qazaqstan oblysynda ornalasqan. Olar - Saýran, Túrkistan, Sidaq, Qaraspan, Jýantóbe, Kúltóbe, Otyrar, Bórjar eskertkishteri. Bul týraly búgin oblys ákimi J.Túimebaev «Qazaqstannyń Uly Jibek jolyna saiahat» halyqaralyq festivali aiasynda ótip jatqan «Ontustik Tourism. Invest 2017» týristik, investitsiialyq forýmynda aitty, dep habarlaidy "Ult aqparat" óńir basshysynyń baspasóz qyzmetine silteme jasap.
«Elbasynyń «100 naqty qadam» Ult josparyna sáikes «Qazaqstan Respýblikasynyń týristik salasyn 2023 jylǵa deiin damytý tujyrymdamasy» bekitildi. Ońtústik Qazaqstan oblysy «Uly Jibek jolyn qaita jańǵyrtý klasterine» engizilip, klaster «Uly Jibek jolynyń júregi» retinde sipattalyp otyr. 1200-den astam tarihi-arheologiialyq, mádeni-arhitektýralyq eskertkishteri, Uly Jibek joly aýmaǵyndaǵy eń tanymal jáne tarihi qundylyǵy joǵary, IýNESKO-nyń dúniejúzilik mádeni muralar tizimine engen Qoja Ahmet Iasaýi kesenesi ornalasqan Ońtústik Qazaqstan oblysy atalǵan mártebeni alýy - biz úshin úlken abyroi jáne jaýapkershilik», - dedi ákim.
Sonymen qatar óńir basshysy oblystyń týrizmin damytý maqsatynda birqatar mańyzdy jobalardyń júzege asyrylyp jatqanyn atap ótti.
Onyń aitýynsha, Shymkenttiń eski qalashyǵy aýmaǵynda ashyq aspan astyndaǵy murajai ashylyp, Ábý Nasyr Ál-Farabi dúniege kelgen Oqsyz qonysyn jáne Abylai hannyń Ordasy ornalasqan Hanqorǵandy qalpyna keltirip, týrister aǵynyn ulǵaitý jáne Qazyǵurt pen Ordabasy aýdandarynda álemdik standartqa sáikes servisi men týristik infraqurylymy bar brendke ainaldyrý boiynsha belsendi jumystar júrgizilip jatqanyn jetkizdi.
Sondai-aq, oblys ákimi Qoja Ahmet Iassaýi kesenesine keletin otandyq jáne sheteldik týristerdiń aǵymyn eskere otyryp, onyń tarihyn jáne aimaǵyn álemdik murajailar úlgisinde aýdio-video vizýalizatsiialaý jasalyp jatqanyn jáne orta ǵasyrda Otyrar kóne qalashyǵy men Arystanbab kesenesin bailanystyrǵan joldy qalpyna keltire otyryp, sol jol boiynda ulttyq qolóner sheberhanalaryn ornalastyrý josparlary iske asyrylatynyn aitty.
Aita keteiik, búgin Ońtústik Qazaqstan oblysynda alǵash ret «Qazaqstannyń Uly Jibek jolyna saiahat» halyqaralyq festivali aiasynda eki kúndik «Ontustik Tourism. Invest 2017» týristik, investitsiialyq forýmy óz jumysyn bastady.
Onda sala mamandary Uly Jibek jolynda týrizm indýstriiasyn damytýdyń ózekti máseleleri men Jibek joly boiyndaǵy týristik ónimderdi damytý, óńirdiń investitsiialyq múmkindikterin tanystyra otyryp, investorlardy tartý jaiy qaralýda.
