Búgin Ońtústik Qazaqstan oblystyq tilderdi damytý, arhivter men qujattama basqarmasynyń uiymdastyrýymen «Kóshe ataýlarynyń mańyzdylyǵy» taqyrybynda «dóńgelek ústel» májilisi ótti, dep habarlaidy "Ult aqparat" OQO ákiminiń baspasóz qyzmetine silteme jasap.
Jiynǵa oblystyq onomastika komissiiasynyń músheleri, ǵalymdar, aýdandyq, qalalyq mádeniet jáne tilderdi damytý bólimderiniń basshylary men onomastikaǵa jaýapty mamandar jáne buqaralyq aqparat quraldarynyń ókilderi qatysty.
«Dóńgelek ústel» májilisin oblystyq tilderdi damytý, arhivter men qujattama basqarmasynyń basshysy Bastar Esqaraev ashyp, Memleket basshysynyń «Bolashaqqa baǵdar: rýhani jańǵyrý» baǵdarlamalyq maqalasynda onomastika máselesi de keńinen qozǵalǵanyn aitty.
– Táýelsizdik jyldary syndarly memlekettik saiasattyń arqasynda tól tarihymyzdy túletý, jurt jadynda umytyla bastaǵan tarihi ataýlardy qaita jańǵyrtý qolǵa alyndy. Budan buryn kelisilgendei, búkil el aýmaǵynda ideologiialyq turǵydan eskirgen ataýlar ózgertilýi tiis. Osy oraida ákimdikter eldi mekenderge, olardyń quramdas bólikterine, obektilerge ataý berý, olardy qaita ataý kezinde halyq arasynda dáiekti túsindirý jumysyn júrgizýi qajet, dedi basqarma basshysy.
Búginde oblystyq onomastika komissiiasynyń kezekti otyrysyna aýdandar men qalalardan túsken 27 usynystyń qujattary resimdelýde. Budan bólek, Shymkent, Túrkistan, Kentaý qalalaryndaǵy 400-ge jýyq kóshege ataý berý boiynsha respýblikalyq onomastika komissiiasynyń qaraýyna usynystar daiyndalýda.
Basqosýda oblystyq statistika departamentiniń basqarma basshysy Raihan Esbergenova, Saryaǵash aýdandyq mádeniet jáne tilderdi damytý bóliminiń jaýapty qyzmetkeri Erbol Nazarov pen Kentaý qalalyq mádeniet jáne tilderdi damytý bóliminiń bas mamany Saltanat Abdýhanova ataýlardyń halyq pikirimen sabaqtastyǵy, kóshe ataýlarynyń mańyzdylyǵy, tarihi ataýlardy retke keltirý, rýhani jańǵyrý taqyryptarynda sóz sóilep, óz oilarymen bólisti.
Jiyn barasynda óńirdegi ákimshilik-aýmaqtyq birlikter jáne olardyń quramdas bólikteriniń ataýlaryna taldaý júrgizilip, ataýy joq nemese ataýy qaitalanatyn ári ideologiialyq turǵydan eskirgen ataýlardy tarihi jer-sý jáne ulttyq tanymǵa jaqsyn ataýlarmen ózgertý jaiy jan-jaqty sóz boldy.
Aita keteiik, búginde Ońtústik Qazaqstan oblysyndaǵy 15 aýdan, qalada 185 aýyldyq okrýg, 932 eldi meken jáne 11506 kóshe bar.
