Ońtústik Qazaqstan oblysynyń ortalyǵy Shymkent qalasynda ótip jatqan «Ontustik Tourism. Invest 2017» týristik jáne investitsiialyq forýmy aiasynda qytailyq delegatsiia Túrkistan qalasyna bardy. Oblys ákimi Janseiit Túimebaev bastaǵan top áýeli ulttyq ónerdi tamashalady. Sheteldik qonaqtar halyqtyq kásip pen qolóner buiymdaryn tamashalap, qazaq ánderin tyńdady, kóne shahar tarihymen tanysty, dep habarlaidy "Ult aqparat" óńir basshysynyń baspasóz qyzmetine silteme jasap.
Aita keteiik, biyl Túrkistan qalasy Túrki áleminiń mádeni astanasy atanǵanyn aitty.
«Túrkistan - qasietti ári kóne qalalarymyzdyń biri. Er túriktiń altyn besigi bolǵan Túrkistan buryn qandai mańyzǵa ie bolsa, búgingi tańda da sondai. Irgetasy 15-ǵasyrda qalanǵan kesene halyqaralyq IýNESKO uiymynyń tizimine engen. Munda jyl saiyn myńdaǵan týris keledi. Aldaǵy ýaqytta birshama jumystar atqaryp, mejeni arttyratyn bolamyz», - dedi Janseiit Qanseiituly.
Odan soń delegatsiia toby Qoja Ahmet Iasaýi kesenesine at basyn burdy. Ondaǵy kóne jádigerler men qazaq halqynyń tarihi tulǵalarymen tanysty. Arnaiy topty bastap kelgen QHR-dyń Memlekettik týrizm basqarmasy tóraǵasynyń orynbasary Dý Tszian Ońtústik Qazaqstan oblysynda týrizmdi damytý úshin áriptestik tanytatynyn jetkizdi.
«Kez kelgen aimaqtyń shyraiyn ashatyn eń áýeli - adamy. Bul turǵyda men Ońtústik Qazaqstan halqynyń qonaqjailylyǵyna, jyly shyraily adamdaryna tánti boldym. Bul - týrizmdi damytý úshin asa qajetti faktor. Biz kelisim ornatý úshin elimizdegi árbir aimaqtan týristik qaýymdastyqtardy, agenttikterdi alyp keldik. Bolashaqta eki el arasyndaǵy jańa aviabaǵyttardy ashýdy josparlap otyrmyz», - dedi Dý Tszian.
Halyqaralyq forým aiasynda óńirdiń týrizm salasyn damytý baǵytynda birneshe ekijaqty kelisimder jasalatyn bolady.
