Shymkent qalasynyń turǵyny Batyr Ospanov Ońtústik Koreia eline jumys isteýge ketken. Alaida ony tanystary turyp jatqan úiinen óli kúiinde tapqan, dep habarlaidy QazAqparat tilshisi.
Marqumnyń tanystary oǵan anasynyń qaza bolǵanyn estirtpek bolǵan. Alaida habarlasa almapty.
Bolmaǵan soń qaraly habardy jetkizýge úiine kelgende olar Batyrdyń baqilyq bolǵanyn kórgen. Qazir onyń máiitin elge jetkizý qiyndyq týǵyzyp otyr.
«Júregi qysylyp, kúizeliste júrgen. Sol kezde óz-ózime syimai júrmin, qolym jumysqa barmai júr degen edi. Anasy osyndai jaǵdaiǵa dýshar bolǵanyna senbei júrgen. Biraq maǵan naqty qashan qaitatynyn aitpaǵan. Biyl oralýym múmkin degen. Sebebi, oiynda iske asyrsam degen josparlary bolatyn», - deidi marqumnyń jubaiy Zamira Aspanova.
Shetelde jantásilim etken azamat qurylys salasynda eńbek etip júrgen. Endi artynda uly men qyzy qaldy.
Týystarynyń aitýynsha, ol qaitys bolardan 10 kún buryn múlde habarlaspai ketken. Alaida, oǵan deiin jii qońyraý shalyp turypty.
Týystary múmkin anasynyń aýyrǵanyn syrtta júrip estý aýyr tigen bolar dep boljam jasaidy.
«Koreia kómek» qoǵamdyq qory ákimshisiniń sózinshe, Batyr Ospanov zańsyz migrant bolyp jumys istegen.
Al, onyń máiiti 2022 jyly sáýir aiynyń 20-sy kúni óz úiinen tabylǵan. Ondaǵy politsiia departamenti bergen resmi aqparatqa sáikes, ol sáýirdiń 16-sy kúni túnde kóz jumǵan.
«Qazirgi tańda qosymsha tergep-tekserý jumystary júrip jatyr. Máiitti Qazaqstanǵa jiberý úshin «Koreia kómek» zańgerleri jáne Qazaqstannyń Ońtústik Koreiadaǵy elshilik ókilderi tiisti qujattardy rettep, jumys atqaryp jatyr. PD málimetine sáikes, bul azamat júrek talmasynan qaitys bolǵan», - deidi «Koreia kómek» qaiyrymdylyq qorynyń ákimshisi Samat Ahmetov.
Tergeý jumystary aiaqtalǵan soń 26 sáýirde marqumnyń denesi týǵan jerine jetkizilmek.
Alaida máiitti Ońtústik Koreiadan elge alyp keletin kompaniia bul qyzmeti úshin 10 mln von surap otyr. Bul - 3,5 mln teńge. Qazir marqumnyń týystary men tanys dostary osy qarajatty jinap jatyr.
