Ońtústik Koreiaǵa «Lingling» qýatty taifýny jyljyp keledi. Bul týraly Yonhap agenttigi jergilikti meteorologtarǵa silteme jasap habarlaidy.
«Qýatty taifýn Ońtústik Koreianyń soltústigine qatty jyldamdyqpen jaqyndap qaldy. Taifýn juma kúni tústen keiin eldiń eń ońtústigindegi Chedjý aralyna jetedi», - delingen habarlamada.
Atalyp ótilgendei, «Lingling» taifýny osy maýsymdaǵy 13-shi daýyl bolmaq. Jeldiń ekpini saǵatyna 200 shaqyrymǵa jetýi múmkin.
Búkil memlekette qaýiptilik týraly eskertý jariialandy. Chedjý aralyndaǵy áýejaida 25 áýe reisi toqtatyldy. Budan bólek, aral men eldiń basqa da bólikteri arasynda tasymaldaityn 14 jolaýshylar kemesine teńizge shyǵýǵa tyiym salyndy. Inchhon qalasyndaǵy porttan 300 júk kemesi evakýatsiialandy.
