Indýstriia jáne infraqurylymdyq damý vitse-ministri Berik Qamalievtyń aitýynsha, Ońtústik Koreiada júrgen otandastarymyzdyń keibiri elge evakýatsiialaý jolymen qaitýǵa niet bildirgen, dep habarlaidy QazAqparat.
«Búgin buqaralyq aqparat quraldarynyń birinde qymbat biletter týraly (birinshi sanattaǵy elderden keletin Qazaqstan azamattarynyń elge qaitýy úshin) jazylǵanyn baiqap qaldym. Ońtústik Koreiada Qazaqstan elshiligine júginip, elge evakýatsiia jolymen oralýǵa niet bildirgen otandastarymyz bar. Alaida qazir evakýatsiia jasaityndai másele sonshalyqty ótkir emes. Buǵan deiin aitqanymdai Qazaqstan men Ońtústik Koreia arasynda apta saiyn reister oryndalýda. Apta saiyn 700 jolaýshyny jetkizýge bolarlyqtai reister oryndalyp jatyr», - dedi Berik Qamaliev OKQ-da ótken baspasóz máslihatynda.
Eske sala ketsek, Berik Qamaliev Qazaqstanǵa keletin jolaýshylardyń tasymalyn shekteý boiynsha jańa sharalardyń engiziletinin málim etken edi.
Onyń aitýynsha, 8 naýryzdan bastap 1-shi sanattaǵy elderdiń azamattary Qazaqstanǵa kire almaidy.
Qazaqstan birinshi sanatqa kirgizgen elderdiń ishinde – Ońtústik Koreia da bar. Alaida bul shekteýdiń sol eldegi Qazaqstan azamattaryna qatysy joq.
