2019 jyldyń alǵashqy tórt aiynda Ońtústik Koreiadan Ózbekstanǵa 34,4 million dollar aqsha jiberilgen. Bul 2018 jyldyń dál osy kezeńimen salystyrǵanda 58 paiyzǵa artyq. Bul aqparatty Ózbekstannyń ortalyq banki habarlady, dep jazady Azattyq.
Sońǵy jyldary Koreiadan Ózbekstanǵa jiberilgen qarjy kólemi turaqty túrde ósip keledi. 2016 jyly Ózbekstanǵa Koreiadan - 49 million dollar, 2017 - 64,4, 2018 - 108,3 million dollar aýdarylǵan.
Ońtústik Koreia Ortalyq Aziianyń eńbek migranttary kóp baratyn elder qataryna kirip otyr. Ońtústik Koreianyń kóshi-qon qyzmetiniń dereginshe, 2017 jylǵy elde 62 myńnan astam ózbek azamaty bolǵan. Bul elde Ortalyq Aziia elderinen barǵan eńbek migranttary qatarynda qazaqstandyqtar da bar.
Ótken jyly Qazaqstannyń syrtqy ister ministrligi Ońtústik Koreiada resmi tirkelip jumys isteýge nemese basqa da sebeppen, emdelýge, týrizm jáne oqýǵa barǵan 19 myń qazaqstandyq bar ekenin habarlaǵan. Buǵan qosa, 12 myń qazaqstandyqtyń zańsyz júrgenin málimdegen.
